Pynkhuid ki dkhot ka Jingïaseng Samla Jowai Presbytery ïa ki rud ka Wah Myntdu

Jowai, Naiwieng, 30: Kum shi bynta ban pynneh pynsah ïa ka jingitynnad jong ka mei mariang bad ban ïoh ïa ka umbam umdih kaba khuid ba suba, ki dkhot jong ka Jingïaseng Samla Jowai Presbytery, Jowai lyngba ka Socio & Economic Life Development Jingïaseng Samla Jowai Presbytery ha ka sngi Saitjaiñ ki la leit ban tam ïa ki jaboh jabaiñ ha shilynter jong ka Wah Myntdu kaba long ka nongbsa umbam ïa ka sor Jowai.
Ïa kane ka jingpynkhuid la sdang naduh ka bynta jong ka Jaka Jwai (Treïongriang) ter ter shaduh ki bynta jong ka jaka tan umbam ha Mupiah, ha kaba la ïashim bynta da ki dkhot na ki Jingïaseng Samla Balang bapher bapher kiba hap hapoh ki 3 tylli ki Jingïaseng District kata (Jowai, Thadlaboh bad Mustem).
La sdang ïa ka jingpynkhuid da ka jingduwai ba la lamkhmat da u Tbn. P.L. Dkhar, ha ka jingdonlang u Secretary JSJP u Bah D. Pasleñ ha kaba u TBn. S.S. Suting uba dei u Chairman JSJP ula ai ki kyntien pdiang sngewbha sha baroh ki dkhot kiba la poi sha kane ka jingpynkhuid ïa ka Wah Myntdu kumba la pynbeit.
Kane ka dei ka sien ba nongkong ïa ka Socio & Economic Life Development Jingïaseng Samla Jowai Presbytery ban shim ïa kane ka sienjam ban wanrah ïa ka jingkhuid jingsuba ïa ka Wah Myntdu, kaba la sdang ban shah pynjulor ha u khun bynriew ha kiba bun ki bynta naduh ka jingbret pathar ïa ki ñiut ki ñier bad ka jingpyntuid ïa ki jakhlia ba bun jait sha ki bynta ka Wah.
Kum ka Jingïaseng Samla Presbytery ka don ka bynta kaba khraw eh bad ban leh eiei halor kane, kumta ka la shim ïa kane ka lad ‘kum ka jingsdang ban wanrah ïa ka jingbha jingmiat’. Ka Jingïaseng Samla Presbytery kan dang bteng biang ban shim ïa kum kine ki lad ban ïada ïa ka jingitynnad ka mei mariang.
Ha kajuh ka por ka la kyntu ïa ki rawon ba kin long kiba lehkhuid haba ki leit khwai doh namarba bunsien ki rawon ki ju bret baphar ïa ki ñiut ki ñier hadien ba ladep pyndomkam khamtam ïa ki plastik bad ki klong um nalor kiwei.
Ki dkhot ba kynthup naduh ki samla kynthei, ki samla shynrang, ki dkhot jong ka Jingïaseng Samla Jowai Presbytery, ki Pastor lem bad ki riew rangbah ki ïashim bynta da kaba khar ïa ki ñiut ki ñier naduh ki plati, ki klong um bad kiwei de ki jakhlia ban pynlum pynlang shi jaka ban ïoh thang lut ïa ki.
La pynkut ïa kane ka jingpynkhuid da ka jingai khublei na u Secretary jong ka Socio & Economic Life Development u TBn. D.W.C. Shullai bad ka jingduwai pynwai da u Rev. K. Dkhar.
Ka Socio & Economic Life Development JSJP ka kyrpad ïa baroh ki nongshong shnong kiba don tawiar jong ka Wah Myntdu, ba kin don ka jingkitkhlieh ïa ka jingkhuid jingsuba bad ym bret pathar ïa ki jakhlia sha ki bynta ka Wah Myntdu kaba dei ka nongbsa umbam.