Nongstoiñ, Nailar, 23: Ka seng ki Nongkhaïi Shyiap Maw West Khasi Hills District, mynta ka sngi ka la pynlong ïa ka jingïalang kyrpang ha Mecofed Hall Nongstoiñ, kum shi bynta ban ïa phylliew jingmut kumno ban pyntyllun shakhmat ïa ki jingïakhih, hadien ba ka sorkar ka la pyrkhing ban tih Maw tih Shyiap ha ka thaiñ.
Ha kane ka sngi ka kynhun hapoh ka jinglamkhmat jong u bah Pynlangbor Nongbri, u ba dei u Lamphang jong ka seng bad u Mawkordor Kharsyiemlieh kum u Pyndap Phang jong ka seng, haba kren bad u nongthoh khubor, ki la ong ba ka seng ka pynpaw ïa ka jingsngewnguh ïa ki paidbah kiba la kyrshan ïa ka jingpynsangeh shalan Maw bad Shyiap ha kine ki ar sngi kaba la dep.
Kane ka pynpaw ba ki paidbah ki don ka jingïatreilang bad ka seng, kumta ka seng mynta ka sngi hadien ka jingïalang, ka la shim ruh ïa ka rai ba kan dang ïai bteng ïa ka jingïakhih da kaba khang ïa baroh ki Kali, ki Nongshalan Maw bad Shyiap ha ka thaiñ hi baroh kawei, tad ynda ka sorkar kan da pynbeit da kumwei pat. Namar ka seng da lei lei kan ym lah ban pdiang ne bud ryntih ïa ki kyndon jong u snem 2016 namar ka eh than, ong kitei kitei ki nonglamkhmat.
Ha kajuh ka por ka seng ka la kyntu ruh ïa ka sorkar, ba kan da khmih bniah biang sa shisien pat ïa katei ka kyndon jong u snem 2016, lym kumta naduh mynta ka sngi, naduh ki ophis sorkar, ki riew paidbah bad kino kino kiba hap ban pyndonkam ïa u Maw u Shyiap, kin ym ïoh shuh haduh ban da pynbna biang da kumwei pat lyngba ka seng.
Kum ban shu pyntip ha kane ka kynhun la kynthuplang ki Trai Crusher, ki Kali kit Maw kit Shyiap, ki Nongñiah Kali kit Maw kit Shyiap, ki Nongkhaïi Maw Nongkhaïi Shyiap bad kiwei kiwei.
