Mynjur ki paidbah ïa ka jingtih dewïong ha ka par jong ka Nehlang Lyngdoh Coal Block

By Mawphor News Desk On Aug 24, 2024

Khliehriat, Nailar, 23: Ki paidbah jong ka East Jaiñtia Hills District bad na kiwei kiwei ki jaka ruh kumjuh kiba ju im ja kpoh da kaba tih dewïong bad khaïi dewiong, mynta ka sngi jong ka 23 tarik u nailar 2024 sa shisien pat ki la ïa poi lang sha ka public hearing ba la pynlong ha ka dong Lumiakhih ha shnong Wahsarang na ka bynta kawei ka project tih dewiong kaba dei ka Scientific mining ba la long trai da u ma Nehlang Lyngdoh kaba la tip kum ka Nehlang Lyngdoh Coal Block kaba ha ka jaka kaba heh 100 hectares.
Ha ka public hearing ym shym la don mano mano ruh ba pyrshah ïa kane ka jingthmu ban tih dewiong kaba dei ka scientific mining kaba yn sa pyntrei da ki kor ki bor, ïa ka jingbatai ba bniah halor kane ka project la batai bad pynshai da ka kynhun jong ki consultant kiba la batai ruh ba kane ka rukom tih dewïong kan myn ktah ïa ka mariang sawdong bad batai ruh shibun kiei kiei kiba iadei bad kane ka project ba kynthup ruh ïa ki kyndon ba ki trai par ki dei ban bud ryntih.
Hadien shi phew snem kynthih jong ka jingshah shitom ki paidbah jong ka East Jaiñtia Hills District kiba ju im ja da kaba tih dewïong bad khaïi dewïong bad ba la khanglad pat ban tih bad ban shalan ïa u dewïong da ka National Green Tribunal naduh u bnai ïaïong jong u snem 2014 hynrei lah ban ong ba mynta ka kynti pat ka la wan poi da kawei pat ka rukom ban tih dewiong kaba da ki kor ki bor kaba lah ban ong ba ka East Jaiñtia Hills District ka dei ka district kaba nyngkong eh hapoh ka jylla kaba yn sa pyntreikam ïa ka Scientific mining bad la khmih lynti ba kane ka iaid beit shakhmat ban sei ïa u dewiong uba don ha ki par dewiong kiba don hapoh ka district.
Kaba kum kane ka public hearing la dep ban pynlong ruh hynnin ka sngi ha shnong Byndihati, ha kaba ki paidbah jong ka East Jaiñtia Hills District ki la pynpaw da ka dur khmat kaba dap da jingkyrmen bad jingkmen ba la iohlad biang ban tih ïa u dewïong kaba yn pyntrei da ki kor ki bor.
Kiba la ai jingkren ha rynsan ki kynthup ruh u MLA barim jong ka Khliehriat, uba dei ruh u Adviser jong ka Jaintia Coal Mininers and Dealers Association, u bah Justine Dkhar ha kaba u la ai khublei kyrpang ïa ki ar ngut ki rangbah kiba na East Jaiñtia Hills District kiba la mih shakhmat ban aplai ïa ka Mining Lease bad ioh ruh ïa kane ka Mining Lease na ka sorkar ban leh ïa kane ka Sciencetific Mining, namar haba sngap ïa ka jingbatai ki consultant (Presentation) kane ka kam ka long kaba eh bha, u la ai ka jing kitbok kitrwiang ïa ki ba kin nang ïaid shakhmat bad khmihlynti ruh ba kin sa dang don shuh shuh ki riew rangbah ki ban sa mih shakhmat bad ioh shuh shuh ïa ki mining Lease.
U President jong ka Jaiñtia National Council, u bah Sambormi Lyngdoh, u la ong bad ai mynsiem ban long kiba skhem jingmut namar ka kam trei dewiong ka dei ka ja kpoh jong ki paidbah “Ngi na ka Jaiñtia National Council ngi ai ka jingkyrshan kaba pura ïa kane ka jingtih dewïong” ong utei u nongialam ka JNC, u la ong ruh ba kam long kaba suk ban ioh ïa ka license namar kane ka license hap ban ioh na ka sorkar pdeng ha kaba hap ïaid bun ki jingeh “Ngi sngew sarong ba ka Scientific Mining ka sdang na East Jaiñtia Hills District, hooid don ki paidbah kiba shah ïalam bakla kiba la ong ba kane ka jingtih dewiong ka dei ka jingiohnong jong u wei ne ar ngut eh, hynrei nga ong ïa phi paidbah ba phim dei ban shah ialam bakla namar kane ka dei ka jingtrei kaba ai kam ïa kiba bun ki briew”
U Spokerperson jong ka East Jaiñtia Truck Owners and Transporters Association, u bah Soomeyoo SNS Sayoo, u la ong ba kane ka dei ka sngi kaba sah kynmaw (historical day) kaba pynsah nam ïa ka lawei lyngba ki ar ngut ki rangbah u bah Nehlang Lyngdoh bad u bah Thomas Nongtdu “Ngi ki briew kiba im da ka kam dewiong ngi la shu shah pynbor ban im da kumwei pat, ngi la shu shah pynbor ban weng noh ïa ki kam ki jam bad ki jingbahkhlieh, ngi kyntu ïa u Deputy Commissioner bad ïa baroh ki tnat ba dei peit ba kin iarap ban pynioh lad kham kloi ban ioh pyntrei noh kloi ïa ka kam tih dewïong, ngi la iohi ha ki por ba la leit ba ka East Jaiñtia Hills District ka la noh syniang shibun ïa ka jylla namar ka ri Jaiñtia ka dei ka jaka jong ka ngap bad ka um, hynrei mynta pat la kum ba ai drip ban kjit tangban im kaba la ktah haduh katta katta, kumta ngi donkam ban ioh pyntrei noh ïa ka kam, ngi la iohi ïa ki kam ba radbah jong u bah Nehlang Lyngdoh kum u nongialam kumta na ka liang ka Trock Owners and Transporters Association ngi ai ka jingkyrsha ba pura ïa kane ka jingtih dewïong u bah Nehlang Lyngdoh ha kane ka jaka”
Kiba la ai jingkren ki kynthup ruh u Waheh Shnong Wahsarang, u bah Bhalang Lamo, Waheh Shnong Rymbai, u bah Merimon Rymbai, Waheh Shnong Wapungshnong, u bah Kdupalng Ryngkhlem, u bah Balios Swer bad kiwei kiwei, kine baroh kiba la ai jingkren ki la ai ruh ka jingkyrshan ba pura ïa kane ka jingtih dewïong ha Wahsarang bad kyntu ruh ïa ka tnat ba dei peit ba kan pynkloi noh ban ai ïa ka cleareance ban dup ioh ban trei noh ïa kane ka jingtih dewïong.
Ia kane ka public hearing ha Wahsarang ruh la khot pynlong da ka tnat Meghala State Pollution Control Board bad ïa ka prokram la pynïaid da u Environmental Engineer jong ka tnat MSPCB u bah Y.F.Laloo ba la ïa don ryngkat lang ruh u Deputy Commissioner ka East Jaiñtia Hills District, u Shivanh Awasthi, IAS, u Superintendent of Police East Jaiñtia Hills District, u Giri Prasad, u Member Secretary jong ka Meghalaya State Pollution Control Board, u Dr G.H.Chyrmang, u Environmental Engineer ka MSPCB, u bah J.F Lamurong, u bah Nehlang Lyngdoh, uba dei u rai par dewiong uba la ioh ia ka Mining Lease na ka sorkar, u MLA barim jong ka Sutnga Saipung, u bah Shitlang Pale bad kiwei kiwei ki riew rangbah. khynthei bad shynrang kiba na ki shnong bapher bapher jong ka East Jaiñtia Hills District, kiba la rah ruh da ki pla card kiba don ki jingthoh bapher bapher kiba pynpaw ïa ka jingkyrshan jong ki ïa kane ka Public Hearing.