Nongstoiñ, Nailar 25: Ki nonghikai jong ki skul SSA jong ki ar tylli ki district kata ka West Khasi Hills bad Eastern West Khasi Hills District, hapoh ka shatri jong ka All Meghalaya SSA School Association, ki la pynkhreh shait shait ban mih madan ban pynlong da ka jingïakhih namar ka jingbym patiaw ka sorkar ïa ki jingdawa ba ka Associtiation ka la pynsngew la bun bun sien halor ki jingeh ba ki ïakynduh.
Katei ka synjuk ki nonghikai skul SSA ki la shim ïa ka rai, ha ka jingïalang kaba ki la pynlong ha ka sngi saitjaiñ ka 24 tarik ha Mount Hermon Secondary School New Nongstoiñ. Ha ka jingïalang kaba la pynïaid da u babu D.Nongkseh president ka AMSSASA West Khasi Hills District, ka jingïalang ka long ban ïatai sani bad ban ïapyrkhat bniah halor kiba bun ki jingeh ba ki nonghikai ki ïakynduh na ka daw jong ka jingbym shimkhia jong ka sorkar ïa ki jingdawa ba ka Association ba ka dei ban pynkiew noh ïa ka tuklop jong ki.
Nalor kata la ong ruh ba ki nonghikai SSA ki dap da ka jingsngewkhia halor ka jingleh bym kheiñ snep jong kane ka sorkar naduh ka MDA I haduh ka MDA II. Hynrei ki sorkar ba mynshuwa wat la kim lah ban regularize ïa ki post jong ki nonghikai skul SSA ruh, pynban ka don ka kabu bad ki ju ai ka kabu na ka bynta ki nonghikai ha ki lai haduh saw snem.
U babu D.Nongkseh haba ïakren bad u nongthoh khubor hadien ba la wai ka jingïalang, u la ong ba hadien katei ka jingïalang ka Association kan sa pynsngew sha ki nongïalam jong ka sengkmie, ba kin khot da ka jingïalang ban ïapyrkhat bad ban pynbeit ïa ka por bad ki tarik ban sdang ïa ka jingïakhih.
Nalor kata u la ong ruh ba hadien ba ki la dep ban pynlong ïa ka general meeting bad ka sengkmie, kin sa pynbeit ïa ka por ban sdang ïa ka jingïakhih bad la kumno kumno kin pynlong ïa katei ka jingïakhih hapoh u bnai Nailar, khnang ba kan ym ktah ïa ki khynnah skul ha ka por Exam.
U la kyntu ruh ïa baroh ki nonghikai jong ki skul SSA ban klet noh ïa ki jingsngew pher kynhun ne Association, hynrei kin pynkhreh ban leit ïashimbynta ha ka jingïakhih ynda la dep pynbeit ïa ka por. Namar katei ka jingïakhih ka long ban pynsngew sha ka sorkar ba kan pynurlong noh ïa ki jingdawa jong ki, kiba la sahteng la slem bad ba ka sorkar kam dei ban kheiñ dew thala ïa ki nonghikai, namar ki nonghikai ki dei ki nopngsaiñdur na ka bynta ka lawei jong ki khun ki kti jong ka jylla.
Lada ki nonghikai kim trei shitom yn ym don babu, sahep, ophisar ne ki riew nang riew stad bad kano kano ka jylla ne ka ri ha ka pyrthei kan ym lah ban kiew shaphrang lada ki paitbah ki dei ki bym nang bym stad.
