Sha u EE PWD ujor u Bah Marshall Biam ba sniew ka surok na Lad Lakadong sha Hingaria

Khliehriat, Nailar, 25: U Bah Marshall SB Biam uwei na ki riew pawkhmat ka thaiñ East Jaiñtia Hills, myn ha ka 22 tarik mynta u bnai u la phah da ka jingujor sha ua Executive Engineer (EE) PWD (Rds), EJHD ha kaba iadei bad ka jingsniew ka surok ha ki thaiñ khappud kata naduh na Lad Lakadong sha Borkhat, Natbor, Pdieng Wahkhriem, Demlakang Kwator shaduh ka shnong Hingaria, EJH kaba la wanrah ïa ka jingeh kaba khraw ïa ki paidbah nongleit nongwan.
U la ong ba ha kine ki khyndiat bnai ba la dep la sakhi ïa ka jingther slap kaba la nangpynjulor shuh shuh ïa baroh ka shilynter jong ka surok kaba la dap satang da ki thliew ki syar.
Nalor kata u la ong ba ka jingpyniasoh ha ka leit ka wan bad ka kit ka bah lyngba kane ka surok ka la ktah jur ïa ki paidbah babun balang khamtam ïa ki nongshong shnong jong ka thaiñ kiba hap ban leit na kawei ka shnong sha kawei pat khamtam haba jia ka pang ka shitom bad kaba ju wanrah ruh hateng ïa ka jingduh ei jong ki mynsiem briew.
“Ngi la leit mih sha ki bor ba dei khmih, ki heh ka tnat PWD ka East Jaiñtia Hills kiba dei khmih na ka bynta ka jingshna bad maramot ïa kane ka surok, hynrei kim shym la don satia kano kano ka jingshim khia na ka liang ka jong ki, kata wat hadien ba la bteng ban pynpaw ruh lyngba ki lad pathai khubor,” u la bynrap.
“Kumta ngi kyntu jur ïa ka Sorkar bad ka tnad ba dei khmih ba ki dei ban shim mardor ïa ki sienjam ban shna bad maramot ïa kane ka surok khlem da pynslem, bad lada ka sorkar kam shimkhia halor kane ngim banse ban shim da kiwei pat ki sienjam,” u la bynrap.