Kan long ka jingtim lada ngi rhah spah bad ngi duh ïa ka tyllong um; ong ki nongshong shnong Umroi Madan

Nongpoh, Nailar 25: Katto katne ki nongshong shnong ka Umroi Madan kila mih shakhmat ban pynshai biang hadien ka jingpynphai ñia jong ki nongïalam shnong kiba la kynnoh ba kila don katto katne ngut ki nongshong shnong kiba pyrshang ban ïalam bakla ïa u paidbah halor ka jingthmu ka sorkar ban shna ïaka surok 4-Lane na Umiam sha Malidor ka ban ïaid ruh naki ranab lum jong ka shnong Umroi Madan kaba kila kynnoh ruh ba kan ktah iaka tyllong um jong ka shnong Umroi Madan.
Haba kren sha ki lad pathai khubor naka liang u Bah CL Masharing bad u Bah T Marbaniang haka jingdon lang kiwei kiwei ki riew rangbah kila pynshai ba katei ka jingkynnoh ki nongïalam shnong ba ki pyrshang ban ïalam bakla ïa u paidbah ka long kaba khlem nongrim namar dei maki kiba la ïalam bakla ïa u paidbah.
Ki la ïathuh ruh ba naduh 23 tarik Naiwieng jong u snem bala dep kala don ka jingujor jong ka shnong sha u DC ka Ri-Bhoi ba dei ban pynkynriah ïaka surok 4-Lane bad kila ioh ruh ka jingthoh ba u DC ka Ri-Bhoi u la phah da ka jingthoh sha ka NHIDCL kaba dei ka kompani ba pyntrei ïa katei ka surok ba ka dei ban shimkhia halor katei ka jingkyrpad jong ka Dorbar Shnong Umroi Madan ban pynlait ïaka tyllong um jong ka shnong, hynrei hadien shisnem duna kum ki paidbah kim tip satia ïa kata ka jingleit ujor bad kim shym la ïathuh sha ki paidbah, kim rah ruh haka Dorbar Shnong hynrei kila kynnoh pynban ba kila don ki nongshong shnong kiba pyrshang ban ïalam bakla hadien ba kila leit ban ujor syndon sha u DC ka Ri-Bhoi.
Ki la pynpaw ruh ba kum ki nongshong shnong ki dap da ka jingsngewkhia halor katei ka jingpynkynriah ïaka surok 4-lane naka surok bala don lypa mynta namar ki tip shai ba katei ka kan ktah 100 naka 100 ïaka tyllong umdih jong ka shnong.
Ki la ong ruh ba kala don ka jingpynshai da ki nongïalam shnong ba katei ka jingpynkynriah ka long kumba 50-meter ka jingjngai na katei ka tyllong um, hynrei naka liang kitei ki nong shong shnong kila buh jingkylli kylla hadien bala dep tih ïaka khyndew bad ïa u lum hato katei ka tyllong um kam ktah? Da kaba bynrap ruh ban duh im ki paidbah ka dei ka kam iap kam im bad kila don ruh ki riew rangbah kiba la ai jingmut ban lum da ka dorbar hynrei katei ruh la shu sngap man man.
Ki la ïathuh ruh ha u bnai Jylliew la pynlong ïaka Dorbar kut snem ban ai ïaki report treikam bapher bapher hynrei kaba sngewkhia ka long ba u Rangbah Shnong bad ka Executive Committee kim shym la wanrah ïa katei ka mat haka Dorbar, dei namar kata ka daw ngi sah haka lyngngnoh bad haba ngi leit ban ujor sha u DC ki ong pynban ba ïalam bakla.
Shuh shuh kitei ki riew rangbah kila ong ruh ba kine ki nongïalam shnong haka jingkren jong ki sha ki lad pathai khubor kila ong ba lada ïaid katei ka surok na ka lynti kaba rim ruh biang bad ba thymmai ruh biang lada dei ha kata ka rukom kan don jingmut aiu kata ka jingujor jong ki bad kaba sngewsih ka long ba kata ka jingpynkynriah ka long tang 50 meter bad kum ki nongshong shnong ngi ong ba lada ka jngai kumba 500 meter lane 1km long ban ïaid hynrei kum ki paidbah kin pyrshah beit ïa katei ka jingthmu, namar kan long ka jingtim ïaki paidbah lada ngi rhah spah bad ngi duh noh ïaka um ban bam ban dih.
Kum ki nongïalam shnong kila kyrpad ruh ïa u DC ka Ri-Bhoi ba u dei ban shimkhia ban nym ñiewbeiñ ïaki paidbah kiba pyndonkam ïa katei ka tyllong um kumba ka sorkar ka don ka jingangnud ban pynneh ïaki tyllong um bad ki khlaw ki btap.