Ba ïeng ka Signboard kyrteng shnong Sakwang ha u pud synshar shnong Jakrem, weng ka DS Jakrem

Mawkyrwat, ‘Nailar 25: Ka Dorbar Shnong Jakrem hapoh ka jingïalam jong u Myntri Shnong ha ka sngi saitjaiñ jong ka taïew ka 24 tarik u ‘Nailar, 2024 da kawei ka rai ki leit ban weng noh ïa ka jingthoh ne signboard ba don don ka kyrteng Shnong Sakwang ba la wan pynïeng hapoh u pud synshar Shnong Jakrem, South West Khasi Hills District.
Haba kren ha ki lad pathai khubor, u bah P. Wahlang, Myntri Shnong Jakrem ula ong ba ka jingleit ban weng noh jong ka Dorbar Shnong Jakrem ïa ka jingthoh ne signboard ba don ka kyrteng jong ka Shnong Sakwang ka long namar ka jingwan pynïeng ïa ka ka long hapoh u pud synshar shnong jong ka Jakrem. “Ka jingweng noh jong ka shnong Jakrem ïa ka signboard ka long namar ka jingwan buh ne thung ruh kam shym la don kano kano ka jingïakren ne ïa pynbeit na baroh ar liang shnong”, ong u Myntri shnong Jakrem.
Shuh shuh u la ong ruh ba ïa kane ka jingthoh ym lah ban ong la ka dei ba la wan thung da ka tnad PWD (Roads) ryngkat ka shnong Sakwang ne kumno, namar ka jingïakren bad ka shnong Jakrem naduh ba sdang kam shym la don, kumta ym banse ka shnong Jakrem ka la weng noh.
Ula ïathuh ruh ba shwa ba ki nongwan thung kin wan thung ïa ka signboard, kam shym la don kano kano ka jingïakren sngewthuh lang na baroh ki ar liang shnong bad kane ka wanrah jingeh shibun.
Namarkata, u bah P. Wahlang, Myntri Shnong Jakrem ula buh ka jingkyrpad ym tang ïa ka tnad PWD (Roads) hynrei wat ïa kiwei de ki tnad treikam jong ka sorkar ba lada don kino kino ki kam kiba tyngkhuh ha ki mar pud jong ki shnong, dei ban da don ka jingïapyntip ne kynjoh ktien ym tang shiliang shnong hynrei ïa baroh ar ki shnong khnang ba kan nym buh jingeh hadien habud kumba ka jia ha kane ka kynti ba mynta ha ka shnong Jakrem bad ka shnong Sakwang.