Shillong, Risaw, 25: U Myntri ka tnad Taxation jong ka sorkar jylla, u James K Sangma ha ka sngi Ba-ar u la pyntip ba ka sorkar ka la don mynta ha ka jingpynkhreh ïa ka Draft Ordinance na ka bynta ban pyndam noh ïa ka Meghalaya Regulation of Gaming Act, 2021.
“Kane kadei ka rukom treikam haba ym don ka Dorbar. Kum ïa kine ki kam ban pyndam noh ïa ka aiñ kaba la don, donkam ban ïaid da ka lynti jong Ordinance,” ong u Myntri haba kren bad ki lad pathai khubor.
Shuh shuh u ong ruh ba ka jingpyndam ka kham kyllaiñ lada nujor bad ka jingwanrah da ka Act kaba thymmai lane ka Ordinance. “Ngi kwah ban leh sani bha namar ngi kwah ban pyntikna ba shisien ba la pyndam kan ym don shuh kano kano ka jingwit. Kumta ngi kwah ban pyntikna ruh ba kiei kiba ngi leh kan long ha ka lynti kaba beit,” u la bynrap biang.
Lah ban kdew hangne ba ha ka 13tarik mynta u bnai, ka sorkar jylla ka la rai ban pyndam noh ïa ka Meghalaya Regulation of Gaming Act, 2021 hadien ba ki ïoh pdiang ïa ka jingpyrshah bad ka jingpynsngew na kiba bun ki liang.
U Myntri u la pyntip ruh ba ïa katei ka rai la shim da kaba buh hakhmat eh ïa ka jingsngew kaba ki paidbah ki pynpaw pyrthei. Shuh shuh u ong ruh ba hadien bun bnai naduh ba la mynjur ïa ka Meghalaya Regulation of Gaming Act, 2021, ki la don bun bha na ka imlang sahlang kiba pynsngew ïa ka jingsngewkhia haba ïadei bad ka jingktah kaba lah ban mih na ka katei ka aiñ.
La pynkynmaw ruh ba shwa ban shim ïa katei ka rai, u Myntri u la dep ruh ban kynduh ïa bun ki kynhun la ka long naduh ki kynhun jong ki nongïalam balang, ki kynhun trei monsngewbha, ki nongïalam shnong bad ruh na ki kynhun jong ki seng samla bad kiwei kiwei.
“Dei lyngba kitei ki jingkynduh ba nga la pyrshang ban sngewthuh ïa ka jingsngewkhia jong ki paidbah kiba pynpaw ba katei ka aiñ kan donka jingktah kaba jur. Kumta hadien kitei ki jingïalang ba ka la pynshai ïanga ba ka jingsngew jong kiba bun ba donkam ïa ka jylla jongngi ban pyndam noh pura ïa kane ka aiñ khnang ba kin ym don kino kino ki jingjia kiban ktah hadien habud,” la bynrap biang u Myntri.
Ha kajuh ka por u Myntri u la ai khublei ruh ïa baroh kiba la mih shakhmat ban ai jingmut bad syllok bad ka sorkar haba ïadei bad katei ka aiñ.
