Shillong, Risaw 24: Ka jingwan ka ‘erïong Sitrang na ki duriaw Bah jong ka Bengal, ka la lynshop tyngeh hynnin ka sngi ïa kiba bun tylli ki Shnong, khamtam eh ïa ki nongrep.
Kiba bun ki nongrep ki la pynpaw ka jingsngew kthang mynsiem namar ba kane ka jingwan ka ‘erïong ryngkat u slap ka la pynkhyllem ïa u kba ha kiba bun ki jaka. Ki nongrep ki la ïathuh ba kane kadei ka aïom ha kaba u kba u ladei artad ka por ban ih bad la jan dei ruh ka por ban ot.
Ki nongrep ki la ïathuh ba lada wan ka lyer ne u slap ruh ha kaba kum kane ka por, lada u kba um khyllem ka mut ym da lei lei eh. Hynrei lada u khyllem ka mut u kba uba bun un shu duh ei.
“Ngi sngewsih shibun ba ka u kba uba ngi la rep shitom bun bun bnai u la khyllem noh bad kan wanrah ka jingduh kaba khraw ïa ngi ki nongrep”, la ong kiba bun ki nongrep.
Shuh shuh la ïathuh ba kane ka jingwan ka ‘eriong ka la ktah ruh ïa kiwei ki jingthung kum u biskot, ki jhur bad kiwei kiwei.
Nangta ki don ruh ki shnong kiba ki ïing ki sem ki la julor namar ka jingwan kyrthep kane ka ‘erïong.
Ha nongbah Shillong, san ngut ki briew kiba shong ba sah ha Langkyrding kaba don ha ki thaiñ Nongmensong bad Mawpat, ki la sahkut na ka jingshlei um bad la hap ban wan pyllait ïa ki da ki Search and Rescue Team jong ka District Disaster Management Authority (DDMA).
Lah ban kdew hangne ruh ba ba ki don ki District kiba la khang ïa ki Skul mynta ka sngi.
Na ka liang u Myntri Rangbah, u Conrad Sangma mynta ka sngi, u la lum ïa ka jingïalang jong ki Deputy Commisioner (DC) lyngba ka Video Conferencing ban wad jingtip halor ka jingpynjulor kane ka ‘eriong bad u slap. Na ka liang ki DC ki la ïathuh ba la don ka jingshah bat ding elektrik uwei ha East Khasi Hills bad uwei pat ha South Garo Hills District. Nangta la pyntip da ki DC ruh ba ka don ka jingjulor jong u kba ha kiba bun tylli ki shnong. Nangta ka jingtwa khyndew bad ka jingduh ka bording elektrik.
U Myntri Rangbah u la bthah ïa ki DC ba kin shim ki lad ki lynti kiba kyrkieh na ka bynta ban ïarap ïa ki lanot kiba shah ktah ha kane ka ‘erïong. U la bthah kyrpang ruh ïa ka MeECL bad kiwei de ki tnad ba peit ïa ka bording ban moramot kyrkieh ha ki shnong kiba la mad ïa ka jingthut ka ding elektrik.
