Aiti ka Sorkar jylla ha ka NEEPCO ban pynïaid ïa Stage I bad II

Shillong, Risaw 25: Ka North Eastern Electric Power Corporation Limited (NEEPCO) hynne ka sngi kala ïasoi ïa ka Memorandum of Agreement (MoA) bad ka sorkar jylla ban pyntrei ïa ka Wah Umïam Hydro Electric Project Stage I na bynta ban pynmih bording 50 MW bad ïa ka Wah Umïam Hydro Electric Project Stage II na bynta ban pynmih bording 100 MW.
Ïa kane ka jingïasoi MoA hapdeng ka NEEPCO bad ka sorkar jylla la sakhi lang da u Symbud Myntri Rangbah ka jylla Bah Prestone Tynsong u baat ruh ïa ka tnat boding jong ka sorkar jylla, u Abdul Saleh u Chairman jong ka State Planing Board, u P. Bakshi u Commissioner Secretary jong ka tnat Bording ka sorkar jylla, u Anil Kumar u Director (Personnel) ka NEEPCO, B. Maharana Director (Finance) NEEPCO, ki ophisar ka tnat MeECL bad ka NEEPCO.
Kane ka projek kaba ka sorkar ka la ïasoi bad ka NEEPCO la mang ba ka jinglut kan long kumba 1750 klur ong u B. Maharana Director (Finance) NEEPCO bad ïa ka jinglut baroh yn bei tyngka da ka NEEPCO bad ïathuh ba ka jingpynmih bording na kine ki ar tylli ki projek kumba 9.80 Million Unit ka bording ha ka shisnem.
Naka liang u myntri ka tnad bording u Bah Prestone Tynsong u la ong ba kane ka jingïasoi ïa ka MoA hapdeng ka NEEPCO kaba dei ka kompeni ka sorkar pdeng bad ka sorkar jylla kan ïarap ban pyndap ïa ka jingduna bording ha ka jylla namar na kane ka projek 12% na ka jingpynmih bording ka NEEPCO kan hap ban aiei sha ka sorkar jylla bad 1% pat sha ki nongshong shnong kiba don ha jan ka jingpyntrei ïa kane ka projek.
U Bah Prestone u la ong ba ka sorkar jylla haduh mynta ka la ïasoi bad ka NEEPCO ban pynmih bording haduh 200 MW lyngba ka Umïam Stage I, II, III bad u la ong ruh ba ka Umïam Stage III kaba la ïasoi ha u snem 2019 shen yn lah ban pyntreikam noh namar ka jingtrei ka la ïaid shait shait.
“Nga kyrmen ba ka NEEPCO naduh lashai ka sngi kan sdang pyntrei noh ïa ka Wah Umïam Stage I kaba 50 MW bad ïa ka Wah Umïam Stage II kaba 100 MW namar ka sorkar jylla ruh ka kloi ban ïatreilang bad ka NEEPCO ban pyndep noh kham kloi ïa kine ki projek,” u la ong.
U Bah Prestone u la ong ba ki sorkar jylla naduh ki por ba la dep ki ïakynduh jingeh shibun haba ïadei bad ki projek bording bad haduh mynta ka Meghalaya ka lah ban pynmih bording kaba duna mar shiteng na kaba donkam namar ka jingpynmih ka long tang 350 MW hynrei ka jingdonkam bording hapoh ka jylla ka long palat 650 MW, u la ong ha ka jingshisha ka jylla ka don ka jinglah ban pynmih bording palat ïa ka 3,000 MW.
U la ong ba jingïasoi ïa ka MoA bad ka NEEPCO ka long kaba donkam bha namar kane ka wanrah ka jinglah ban pynmih bording khambun ban tem ïa ka jingthut ka bording na ka por sha ka por.
“Ka sorkar jylla ka dang pynkhreh ïa ki lad lynti ban pyntreikam da ki projek bapher bapher naka bynta ban pynbun ka jingpynmih bording namar ka jylla ka biang ka jinglong ka mei mariang haba ïadei bad ka jingpynmih bording,” la bynrap u Bah Prestone.
Haba jubab ïa ki daw kiba ka sorkar jylla ka phai khmat beit sha ka jingpynmih bording na ka um ym na ka sngi kumba kiwei ki jylla ha ka ri ki la sdang phai khmat, u Bah Prestone u la ong ba ba ka daw hi ka dei namar ka jylla ka don ha ka thup ki jylla ba ka jingpynmih bording kan kham lah ban pynmih bun na ka um bad ong ruh ba ha ka jingïalang ki myntri ka tnat bording jong ki jylla ha ka ri kaba la khot da u Myntri ka tnat bording ka sorkar pdeng ha Udaipur ruh u ai jingmut ba ka jylla Meghalaya kan pynleit jingmut beit ka jingpynmih bording na ka um ym na ka sngi. Haba bynrap lang ïa kane u B. Maharana u la ong ba ka daw ka jingkhlaiñ ka bor thang ka sngi ne ka Radiation ha ka jylla ka kham tlot shibun ban nujor bad kiwei pat ki jylla bad u ong, namarkata, ka jingpynmih bording ka ka um ka long kaba biang eh ha ka jylla lada bishar na ka jinglong ka mariang.