Shillong, Risaw, 25: U nongwad RTI u Bah Disparsing Rani ha ka sngi Baar u la kynnoh ba ka don ka jingleh be-aiñ ha kaba ïadei bad ka jingkyntiew kyrdan ïa ki nongtrei hapoh ka ophis jong u Superintendent of Police, Fire and Emergency Services, Shillong.
Ha ka jingïakren bad ki lad pathai khubor, u Bah Disparsing u la ïathuh ba kane ka jingpan jingtip RTI na ka ophis Superintendent of Police, Fire and Emergency Services, Shillong ka long hadien u la ïoh pdiang ïa ki jingkynnoh ba ka don ka jingïoh kiew kyrdan shwa da ki nongtrei kiba dang rungkam hadien ban ïa kiba la rung kam kham ha shwa, kata haba bishar katkum ka Seniority List bad ka Merit List.
“Katkum ka jubab RTI ba la ïoh pdiang ha ka 27 tarik, Nailur, 2022, ka pynshisha ïa ka jingkynnoh ba ka don ka jingkyntiew kyrdan be-aiñ ka bym ïaid katkum ka Seniority List ha ka ophis u SP, Fire and Emergency Service,” u la ong.
“Ka jubab RTI ka pynpaw ba la pynkiew kyrdan ïa ki nongtrei katkum ka Seniority List bad ka Merit List. Ka jubab RTI ka la pynpaw ba ki nongtrei kiba rungkam ha ki snem 1995, 1996, 1999, 2001 ki la shah kyntiew kyrdan bad kito kiba rungkam ha ki snem 1989, 1993, 1995 ki la shah kyntiew kyrdan. Kane ka long katkum ka Merit List,” u la ong bad bynrap, “hynrei ynda la bishar ïa ka Seniority List, ki don kiba la rungkam ha u snem 1983, 1984, 1985 kim pat shah kyntiew kyrdan satia bad ki sahkut shadien. Kata ka dei ka bym lah satia ban pdiang.”
“Kane ka jubab RTI ka pynshihsha ba ka don ka jingkyntiew kyrdan be-aiñ khlem da ïaid katkum ki kyndon, kata, naduh ki Firemen, Leading Fireman, ki Station Officer, ki Sub Officer, kam don ka jingkyntiew kyrdan kaba ïaid katkum ka Seniority ne ka jingshakri slem ha ka kam,” la bynrap u Bah Disparsing.
U la ïathuh ba mynta ka sngi u la phah da ka jingthoh sha u Chief Secretary bad sha u Director General of Police (DGP) ban pan jingpynshai halor kane.
U la ong, tad ynda la ïoh ïa ka jubab na u Chief Secretary ka Jylla un sa lah ban shim ïa ka rai ban leh eiei halor ka jingkynnoh ba ka don ka jingleh be-aiñ ha ka ophis u Superintendent of Police, Fire and Emergency Services, Shillong.
