Phah jurip ka KSU ïa ki skul Sorkar ba duna nonghikai bad maramot ïa kiba la jot

Shillong, Risaw, 25: Ka Khasi Students Union ha ka sngi Baar ka la dawa ïa ka tnat Pule Puthi ka Sorkar Jylla ban jurip noh mardor ïa ki skul Sorkar kiba duna nonghikai bad ban maramot noh ïa ki skul Sorkar kiba don hapoh ka jylli jong ka South West Khasi Hills District bad ha Mawsynram C&RD Block kiba la jot rathai.
Ha ka dorkhas ba la aiti ha u Myntri ka tnat Pule Puthi ka Sorkar Jylla, ka KSU South West Khasi Hills District Unit ka la kyrpad ban phah jurip ïa ki skul Sorkar, Deficit ne kiwei kiwei ki skul kiba duna nonghikai khnang ba yn dup lah ban mang ïa ka post nonghikai ha kum kine ki skul khnang ba kan lah ban ïarap ïa ki khynnah skul ban ïoh ïa ki jinghikai ba paka kumba kiwei ki khynnah skul ki ïoh.
Watla ka South West Khasi Hills District ka la kynjoh la 10 snem eiei ha ka jingïoh ïa la ka jong ka district bapura hynrei ka pule ka puthi ha kane ka district ka long kaba dang sahdien bha haduh katta katta.
Ka seng ka la kyrpad ïa ka Sorkar ban shna pyndep noh ïa ka Block Institute of Education and Training Centre (BIET) kaba ladep buh mawnongrim ha ka shnong Sakwang naduh u snem 2014-15. Ka Seng ka la dawa ba dei ban pynkylla noh ïa ka BIET Centre sha ka DIET Centre khnang ba kan long ka jingmyntoi ïa ki samla kiba angnud ban pyndep ïa ki jingpule ha ka D.El.Ed.
“Kum kane ka Institute kan ïarap ïa ki samla jong ngi napoh ka district ban pyntbit kum ki nonghikai skul ba kin ïoh ïa ki lad kiba biang bad ngi da kwah ba ka Sorkar kan leheiei noh kham kloi halor kane ka bynta,” la ong ka Seng.
“Ka Ophis jong u Director of Schools, Education and Literacy (DSEL) ha ka 3 tarik, Naiwieng, 2021 ka la ai jingmynjur ïa ki katto katne ki Government Lower Primary School ban kyntiew sha ka kyrdan Upper Primary School. Kine ki skul ki long ka Rangthong Nongbah Govt. LPS, ka Nongummer Govt. LPS, ka Pyndenkseh Sepngi Govt. LPS, ka Mawranglang Govt. LPS, ka Rangblang Pombriew Govt. LPS, ka Phlangkynshi Govt. LPS bad ka Thangrai Govt. LPS,” la pyntip ka Seng.
“Ha kaba ïadei bad kine ki skul haneng, ngi sngewdei ban kyrpad ïa phi ba phin mang pisa noh na bynta ki post Nonghikai bad kumjuh ruh ban phah jurip bad mang ban pynheh noh ïa ki iing skul jong kine ki skul,” la bynrap ka Seng.
Ka Seng ka la dawa ruh ba ka tnat Pule Puthi jong ka Sorkar Jylla ka la dei ban buh noh ïa ka SSLC Centre na ka bynta ka jingbit jingbiang jong ki khynnah skul ka shnong Wahkaji, Umdohlun bad Phlangdiloiñ.
Ha kajuh ka por ka KSU ka la dawa ïa ka tnat Pule Puthi ba ka dei ban shna pyndep noh mardor ïa ka skul ha ka shnong Shnongkalong, South West Khasi Hills District. “Kumba ka long mynta, ka jingpyntrei ïa kane ka skul ka la sahteng noh mynta la bun snem na ka daw ka jingbymlah ban pynsted ïa ka kam da ka tnad Pule Puthi,” la ong ka Seng.
Khnang ban wanrah ïa ka jingkhuid jingsuba ha ka thungkam thungjam ha ki post Asst. Teachers ha ki skul Sorkar la long ha ka Contractual ne Permanent Post, ka seng ka la dawa ba ka tnat Pule Puthi ka dei ban bud ryntih ïa ki kyndon jong ka National Council for Teachers Education (NCTE).
“Kum ka seng ngi kwah ba ki nonghikai ba shah thungkam shipor ne ki nonghikai ba shah thung pura ki dei la kumno kumno kiba la pyndep ïa ka Diploma of Elementary Education ( D.El.Ed), kiba la ïoh 45% ha ka Class XII, kiba la pas ïa ka Meghalaya Teachers Eligibility Test (MTET) khnang ba kan ym buh ïa kano kano ka jingeh hadien habud,” la dawa ka seng.
“Ka Sorkar kam dei ban ïaid lait na ki kyndon jong ka NCTE ha ka jingthungkam nonghikai ha ki skul Sorkar khnang ba ka pule puthi hapoh ka South West Khasi Hills District bad ha Mawsynram C&RD Block kan kiew irat ha ki snem ki ban sa wan,” la bynrap shuh shuh ka Seng.