Kyrshan u Bah Disparsing Rani ïa ka jingthmu ka Sorkar ban shna ïa ka Casino

Shillong, Risaw, 25: U nongwad RTI Bah Disparsing Rani ha ka sngi Baar u la pynpaw ba u kyrshan tyngeh ïa ka jingthmu jong ka Sorkar Jylla ban shna ïa ka Casino khnang ba kan kyntiew ïa ka jingïohlum khajna jong ka Sorkar.
Ha ka jingïakren bad ki lad pathai khubor u Bah Disparsing Rani u la ong, “khyndai phew khyndai na ka shispah ki briew ki kyrshan ïa ka jingdawa jong ka HITO (ban pyndam ïa ka jingthmu ban shna ïa ka Casino) hynrei ngam ïahap ïa ka jingpyrshah jong ka HITO ïa ka Casino. Ka Casino ka dei ka khalai jong ki briew kiba riewspah (high profile) bad ma ngi ki rit ki ria ngi don ka khalai mobile, ka khalai khruk khruk, ka ïatur masi, ka khwai dohkha bad kiwei kiwei. Ka dei ka kamram jong ka Sorkar namar ka jinghiran jong ka ïoh ka kot.”
Haba pynksan ïa ka jingkyrshan ïa ka Casino, u Bah Rani u la ong, “ka jylla Sikkim ka bym don jingpynmih eiei ha ki marpohkhyndew hynrei ka jingdon jong ka Casino ka la pynmih ïa ka khajna kaba shyrkhei bha.”
“U la ong ruh ba ngi kiba rit baria, wat tang ban rung ha ka tamasa Cherry Blossom kaba ka dor tiket kaba long T.1000 hajar ruh ngim don pisa, kumno ngi lah ban leit rung ha Casino haba tang ban rung ruh donkam ban don pisa da ki klur tyngka ha ka Bank Account,” la pynksan u Bah Rani.
“Kata ka dei kaei kaei kaba ngam sngew ïahap ïa ka jingpyrshah ïa ka Casino. Lada ka Sorkar ka leh bha ban ai surok ha ka por ba don ki jingïaseng heh, ka jingkylli ka long balei kein phi bishni haba ka Sorkar ka thawlad ban pynmih pisa. Ka Jylla Meghalaya ka dei kaba long pdeng bha ha ka thaiñ Shatei Lammihngi ha ka jingdon ki jaka jngohkai pyrthei,” u la ong.
“Lada shna ïa ka Casino ha Raid Marwet, baroh ki heh spah na Assam bad nabar ka jylla kin wan theh pisa ha kane ka jylla Meghalaya lyngba ka Casino namarba kine ki heh spah ki leit khalai ym ban ïohnong hynrei ban pynjahthait ïalade hynrei ngi shane kiba bun hi ngi leit khalai ban ïohnong,” la bynrap u Bah Rani.
Ha kaba ïadei bad ka jingpynphai nia jong ka Hynñiewtrep Integrated Territorial Organisation (HITO) ha kine ki khyndiat sngi, u Bah Rani u la ong ba ka jingkynthoh dang shen ïa ki kynhun sengbhalang, ka dei halor ka jingïoh ujor na ki katto katne ki briew kiba sngewkhia ïa ka jingshah pyndik jong ki kompeni shna surok ha ki dkhot sengbhalang kiba pynwit da kaba talasi ïa ki kot ki sla jong ki nongtrei bylla.
“Ki sengbhalang ki dei ban pyndonkam da ka jingstad, ïoh lehse ka don ka aiñ kumba la kren da ka HITO ba kata ka Meghalaya Inter State Migrant Workmen (Regulation of Employment and Conditions of Service) Act, 1985 ba ki nongbylla kiba wan sha ka jylla Meghalaya kin hap ban rejister shwa bad ka tnat Labour. Ka lah ban dei ka jingkren jong ka HITO halor ka jingkynthoh jong nga hynrei nga shu pynshai sha ki paidbah. Nga khlem kren ïa kano kano ka ktien kaba jler ne kaba pyrshah ïa ki sengbhalang ne da kaba kdew ïano ïano. Nga dei uwei na kiba kyrshan ïa ka jingdawa ban wanrah ïa ka Inner Line Permit,” u la ong.
U la pynkynmaw ruh ba dang shen ha kawei na ki Kotkhubor Phareng ka la don ka jingkynthoh kaba tyngeh bha ïa ki sengbhalang da kaba jer ïa ki kyrteng jong ki kynhun seng ba ki dei ki seng nongtuh bad kiba don jingïadei bad ki lehnoh, ki seng dawa pisa bad kiba pynjot ïa ka jylla.
“Hynrei ma nga, ngam shym la kynthoh eiei bad nga shu kren ïa kaei kaei kaba ha ka jingsngew jong nga bad kiwei kiwei de kiba kren halor ka jingwan jong ki kam pynroi,” u la pynshai.
U la ïathuh ba u la pan da ka RTI na ka Ministry of Corporatate Affairs halor ka jingsangeh jong ka Kompeni kaba pyntrei ïa ka surok na Umshyrpi sha Mylliem.
“Lada ki kynhun sengbhalang ki dei kiba stad, la kumno kumno ki dei ban dawa ïa ka Sorkar ba ïa ki kompeni kiba trei surok kiba hap ha ka Ministry of Corporate Affairs dei ban pyllait ïa ki namarba ka ïoh ka kot jong ka jylla ka shong ha ka surok,” u la bynrap.