La kynmaw burom ïa ki Volunteer NVDA ba ïakhih Hill State

0

Shillong, Risaw 25: Ka ïing ka sem jong u (L) Bah Eric Bremly Lyngdoh ha ka 24 tarik mynta u bnai, ka la pynlong ka jingkynmaw burom ïa ki Volunteer jong ka Non-Violent Direct Action (NVDA) kiba la ïashim bynta ha ka jingïakhih Hill State.
Ha ka 10 tarik u Nailur ka snem 1968, u (L) Bah Eric Bremly, u la ïalam ïa ka Kynhun ki NVDA na Mawkhar Circle ban pakhang ïa ka ophis jong ka Assam Secretariat ha katei ka por kum ka dak ka jingdawa ban ïoh noh la ka jong ka jylla na ka Assam. Kane ka jingleit pakhang ïa ka ophis ka long da ka lynti kaba jai jai wat hapdeng ka jingkerkut ki Pulit Assam ïa ka Secretariat.
Ïa ka NVDA la thaw ha ka 31 tarik u Lber ka snem 1963 bad ka la long ka jingïakhih da ka lynti kaba jai jai bad poi shaduh ka jingïoh la ka jong ka jylla.
Kum u General Secretary jong ka Seng All Parry Hill Leaders Conference (APHLC) na Khasi Hills District bad u Chief Organiser jong ka NVDA Volunteers, Mawkhar Circle, u Bah Bremly, u la thaw da ki jingrwai ban kyrsiew bad pynshlur ïa ki Samla ha katei ka por ban mih shakhmat ban ïakhun na ka bynta ka Hill State. Ki jingrwai kiba u la thw kidei kiba ki Samla ki dang rwai haduh mynta. Kawei na kine ki jingrwai kadei “Pynkhreh Samla to Pynkhreh mynta”, kaba la mih ruh ha ka jingrwai jong ka Seng KSU ha kine ki snem baladep. U la lum lang ruh ïa kI Longkmie ban mih shakhmat na ka bynta kane ka jingïaleh Hill State. La ong ba kane kadei kawei na ki khep kiba la pynkylla ïa ka jingïakhih Hill State haduh ban da ïoh la ka jong ka jylla ha u snem 1972.
La ïathuh ba don haduh 300 ngut ki Volunteer jong ka NVDA kiba la mih ban pakhang ïa ka Secretariat ha katei ka sngi 10 tarik u Nailur 1968 bad ki don napdeng kine ki Volunteer kiba dang im haduh mynta.
Kane ka jingkynmaw burom ka long ruh kum shi bynta ban rakhe ïa ka jingdap 77 snem ka UNO ryngkat bad ka theme kaba ong, “Non Violence and Food Security”. Ha kane ka jingrakhe la don lang ruh ki dkhot jong ka Meghalaya Model United Nation.
Ha kane ka jingkynmaw burom ia ki Volunteer ka NVDA la pynkup burom ruh ïa ki San ngut ki Volunteer jong ka NVDA 1968 kiba dang don haduh mynta.
U Kongsan ha kane ka jingrakhe udei u Bah Fredrick Kharkongor, IAS Ophisar jong ka jylla. U Bah Fredrick ha ka jingkren jong u, u la ïathuh ba u la ïoh ban pule ïa ka kot kumno ba u Bah Eric Bremly Lyngdoh, u la ïalam ïa ki Volunteer jong ka NVDA Mawkhar na ka bynta ban pakhang ïa ka Secretariat kaba ha katei ka por ka dang dei ka sorkar Assam. U la ong ba u la ïoh pule ruh ïa ka kot kaba ïathuh ba kumno une u nongïaleh Hill State u la thaw da ki jingrwai ban pynkhih ïa ka mynsiem jong ki Samla, nangta jong ki Longkmie ban ïashim bynta ha ka jingïakhih Hill State.
Ha ka jingïakren jong u, u Bah Fredrick, u la ïathuh ruh ba ki jingthoh ki ïathuh ba ka la don ka jingïakynduh hapdeng u Bah Joy Mohon Nichols Roy bad u Phizo, u nongïalam jong ki Naga na ka bynta kane ka jingïakhih Hill State. Hynrei kine ki nongïalam ki la ïaid la ka jong ka lynti, namar ba u Bah Joy u la jied ban ïakhih da ka da ka lynti kaba jai jai.
Ïa kane ka jingïalang kynmaw burom ba la pynlong ha Spring Valley Farm, Mawpat la ïadon lang ki dkhot ka Meghalaya Model United Nations (MMNU) la pynshit pynshngaiñ ruh da ka kynhun nongrwai Somersault kaba la rwai da ki jingrwai ba la thaw da u Bah Eric Bremly Lyngdoh.
Kane ka long katkum ka Kyrwoh ba la phah da u Dr. Bremly WB Lyngdoh, u khun jong i Bah Eric Bremly.

Leave A Reply

Your email address will not be published.