Pynkhreh ka Sorkar ban pynpra sa ïa ki Coke Factory beaiñ ha East Jaiñtia

Shillong/ Khliehriat, Naitung 11: Hadien ka jingpynkhyllem bad pynpra ïa ki Coke Factory beaiñ ha Shallang, ka sorkar mynta ka la pynkhreh ban pynpra sa ïa ki Coke Factory kiba don ha East Jaiñtia Hills District.
Katkum ki khubor ba la ïoh la ïathuh ba tang ha East Jaiñtia Hills District, ki don haduh 34 tylli kiba kum kine ki karkhana, ha kaba ki don kiba shu ïoh tang ïa ka jingmynjur na ka Single Window Agency (SWA) hynrei kim pat ïoh satia ïa ka Consent to Establish (CTE) bad ka Consent to Operate (CTO), lait noh tang katto katne tylli.
Ki khubor ki ong ba ka na ka liang ki bor District kila pynkhreh ban pynkhyllem bad pynpra lashai ka sngi, namar naduh hynnin ki la pynbiang ïa ki jingdonkam khamtam eh ïa ki bomb dynamite, namar ba ki Karkhana kiba don ha East Jaiñtia Hills ki kham heh ban ïa ki Karkhana kiba don ha Shallang.
Na ka liang ka sorkar jylla ruh, ha ka jingpyllait khubor mynta ka sngi, la ong ba ki bor sorkar ki la shimkhia ban pyntreikam ne ban kohnguh ïa ka jingbthah ka High Court of Meghalaya, ha kaba lai tylli kiba kum kine ki Karkhana la dep ban pynkhyllem ïa ki atoskhana bad la bthah ruh ban pynpra lut ïa ki jingtei jong baroh kawei ka karkhana.
“Ka sorkar kam shym la shong kli kti ha kaba ïadei bad ka jingmih kine ki Karkhana beaiñ, namar naduh u Nohprah ka snem baladep, la khang bun tylli ïa ki Karkhana kiba shu mih beaiñ”, la ong ka Kyrwoh na ka sorkar.
La ïathuh ruh ba ka sorkar ka la sdang ban pynkhyllem bad pynpra ïa kine ki Karkhana naduh ka 8 tarik mynta u bnai bad la buh thong ban pyndep haduh ka 20 tariki mynta hi u bnai.
Ka sorkar ka la ïathuh ba ki don ruh kiba donkti ha kaba seng ïa kine ki Karkhana beaiñ kiba la shah kem ha ki Pulit.
Lah ban kdew hangne ba ha kaba ïadei bad ki Karkhana beaiñ ha East Jaiñtia Hills ka la don ka jingïakhih da ki Kynhun bad ki Seng hapoh ka Shatri jong ka Environment Coordination Committee (ECC) naduh ki snem kiba ladep.
Hadien pat la shimkhia da ka High Court of Meghalaya kaba la kynther tyngeh ïa ka sorkar jylla kaba la shu peitkai bad sngap mynthi ïa ka jingmih kine ki Kartkhana beaiñ. Ha ka jingshim bishar ka la lap ruh ba don u dewïong ba la tih beaiñ uba la poi sha kine ki Karkhana beaiñ ha Shallang.
Ka la lap ruh lyngba ka jingujor jong uwei u briew na Assam ba ki don ki Kingpin ne ki Snar na Assam kiba donkti ha kaba khaïi ïa une u dewïong beaiñ bad kine kiba donkti ban khaïi beaiñ ban byrngem byrsit ïa ki nongujor sha ïingbishar.