Shillong, Naitung, 11: Ka ïing jong ka Myntri Sorkar ka Dr. Ampareen Lyngdoh ha Laitumkhrah, Shillong kaba long ruh ka MLA jong ka East Shillong Consttuency ha ka janmiet sngi Baar ka la shah kawang maw ha uwei u briew uba la 46 snem ka rta uba sah ha ka shnong Kharmalki, Malki, Shillong.
Ïa une u briew la kem noh da ki Pulit jong ka Laitumkhrah Police Station bad ki Pulit ki la register case halor kane ka jingjia.
Tang shu ïoh jingtip halor kane ka jingjia, u Superintendent of Police ka East Khasi Hills u Bah S. Nongtnger ryngkat bad u Superintendent of Police (City) u Bah Vivek Syiem ki la leit mar mar sha ka ing jong ka Myntri ban tohkit bniah halor kane ka jingjia.
U Bah S. Nongtnger ha ka jingïakren bad ki nonglum khubor u la ïathuh ba kane ka ka la jia ha ka por kumba 7:19 baje janmiet. Ki bynta jong ka iit ka mala kaba shalor ka la pait bad la lap ruh ïa ki maw kiba la hap shabar jong ka ing.
“Ïa une u briew la ïohkem hi da ki trai ing, katba u dang kawang haduh lai tylli ki maw ïa ka ing. Ngi la kem ïa u bad ngi la ïoh kurup ïa kawei ka wait lyngkut bad ki Pulit ki la register case bad ngi la phah sha Shillong Civil Hospital ban leh ïa ka medical check-up,” la ong u SP.
U la ïathuh ruh ba ki Pulit kin sa pynlong ka jingtohkit la une u briew u dei uba biang lane uba don jingduna ha ka bor pyrkhat.
“Ynda ngi la tohkit, ngin sa lap mano ba donkti lang bad u,” la ïathuh u SP.
U MDC jong ka Laitumkhrah u Bah Joseph Fantin Lakadong uba dei ruh kurim jong ka Dr. Ampareen u la ïathuh ba tang shu ïoh sngew ïa ka jingsawa, ki la ban leit khongoid shabar bad peit ruh lyngba ka CCTV ïa ka jingjia.
“Katba ngi dang peit ïa ka CCTV, ngi la ïohi ïa une u breiw uba la wan phai biang sa shiphang arphang bad u la kawang biang da u maw bad u don sa ka wait ha kti,” la ïathuh u Bah Fantin.
Shuh shuh u la ïathuh ba ki la ïoh ban bat ïa une u briew bad knieh noh ïa ka wait na ka kti jong u.
Katkum ka jingïathuh jong u Bah Fantin, une briew u dei uba sah ha ka shnong Kharmalki, Malki, Shillong.
Haba kylli, u Bah Fantin u la ïathuh ba kum kane ka jingjia, kam pat ju wan jia satia mynno mynno ruh ha ka ing ka sem jong ki bad kane ka dei ka sien banyngkong eh ban wan jia kum kane ka jingshah kawang maw ka ïing.
