Khang ka ïing bishar HC ban pom pathar ïa ki dieng katba ym pat sdang pyntrei ïa ka surok Shillong -Dawki

0

Shillong, Naitung 11 : Ka ïing bishar High Court jongka jylla mynta ka sngi Ba-ar, ka la hukum ba ym bit satia ban pom ïa ki dieng katba ym pat ai ia ka jingtrei bad sdang ka jingtrei ia ka ia ka bynta ba nyngkong (package-I) jong ka surok Shillong-Dawki da ki kontraktor.
“ Halor kane ka kam, ym dei shuh ban nang pom ïa ki dieng na ka bynta ka package-I tad haduh ka por ba ka kam jong ka package-I la aiti sha u kontraktor bad u kontraktor ula sdang ban pyntrei ïa ka kam khlem ka jingpynwit,kynthup hajan ka Observatory ka Indian Institute of Geomagnetism” ong ka Division Bench ha ka hukum hadien ba shong bishar ïa ka PIL.
Ka hukum ka ong ba ka kaiphod halor ka jinglong jingman ba mynta ba la ai da ka Sorkar lyngba u Joint Secretary ka tnad Public Workd (R&B), ka la ong ba ka technical evaluation of bids ka dang ïaid shaid shaid bad ka kam jong ka package-I ym pat shym la ai satia shano shano ruh hadien ba u contractor ba mynshuwa, ula iehnoh ïa ka project.
Ka la kdew ruh ïa ka jingkyrngah jong ka Indian Institute of Geomagnetism ban ai ïa kano kano ka jaka na ka bynta ban pyntrei ïa ka package-I jong ka project.
“Wat lada la ai kam sha u contractor, ka la paw shai ba ka Indian Institute of Geomagnetism kam kwah satia ban ai ïa kano kano ka jaka bad ka National Highway & Infrastructire Development Corporation Limited (NHIDCL) ka sngew ba kam lah ban long ha ka ban pynkylla ïa ka lynti ïaid (alignment) ha kane ka khep ban kiar na ka jingshim jaka naka Indian Institute of Geomagnetism.
Ka la ong, wat lada la thung ïa u kontraktor katba ka IIG ka dang pyneh, ki kam jong ka package-I ki dei ki bym pat lah ban pyntrei satia.
Haba phai pat sha kiwei ki package , ki don bun bah ki jingeh ba ïatakhuh bad ki trai jaka bad watla katto katne ki kam ki ba hap hapoh ka jaka ba ïakajia ki dei kiba la pyntrei, kam shym la paw pat ba kano kano ka package ka dei kaba la biang ban pyntrei noh ïa ka kam.
Ha kajuh ka por, ka ïing bishar ka la pan shuh shuh ïa ka kaiphod ka ban sa ai da ka Sorkar hapoh ka saw taiew.

Leave A Reply

Your email address will not be published.