Kumno ka District Council ka treikam ha Meghalaya, wan peit buit ka Zilla Panchayat ha KHADC

Shillong, Naitung, 11: Ki nongïalam jong ka Zilla Pancyahat Council na North Goa ha ka sngi Ba-ar ki la wan ban peit buit kumno ki District Council ha Meghalaya ki treikam bad kumno ki pynïaid ïa ki kam pynroi bad kiwei kiwei ki kam kiba ïadei bad ka roi ka par ha u pud u sam jong ki.
Katei ka kynhun hapoh ka jingïalam jong u Ajay Gaude kum u CEO bad u Shidesh Shripad Naik, Chairman jong ka Zilla Panchayat jong ka North Goa ki la kynduh ïa u CEM ka Council, Bah PN Syiem kumjuh ruh ïa u Chairman Bah Lamphrang Blah nalor u Deputy CEM Bah PN Syiem kumjuh ruh u MDC ka Mylliem Bah RV Lyngdoh nalor kiwei kiwei ki.
Haba kren bad ki lad pathai khubor, u Chairman jong ka Zilla Panchayat, u Shidesh Shripad Nai u la ïathuh ba ka jingwan jong ki ka long ban ïohi ïa ka bor treikam jong ki District Council ha kane ka jylla bad kumno ki pynïaid ïa ka jingtreikam.
“Ngi leit kylleng ki jylla jong ka Ri ban tip shaphang ka rukom treikam jong ki bor synshar trai ri ha ki jylla bad ki distrik bapher bapher. Ngi leit sha ki district council, ki village panchayat ban tip shaphang ka rukom treikam jong ki, ka rukom synshar bad kaei kaba ngi tip ngin lah ban pynbha shuh shuh ïa ka rukom synshar khnang ba ngin lah pat ban ïathuh ïa ka sorkar jongngi bad ai jingmut kiei pat ki kam kiba kiba ngi lah ban kyntiew shuh shuh ïa ka distrik bad ïa ka jylla,” u la ong.
U Gaude pat u la ong ba ha katei ka jingleit ki wad jingtip ruh kumno ki pynkhuid ïa ki jaboh jabain kiba mih na ki iing ki sem bad kiwei kiwei bad hadien kane ngin sa lum thup ïa ki jingtip bad sa shim pat ïa ka jingai jingmut shwa bad phah sha ka sorkar.
Utei u nongïalam ka Zilla Panchayat u la ïathuh ba ka jingïapher hapdeng ka Council bad ka Panchayat ka long ba ki ïoh ka jingkyrshan na ka sorkar ban leh ïa ki kam pynroi bapher bapher katba ha District Council pat ki lah wat ban pynmih khajna hi.
Na ka liang u CEM u la ïathuh ba ka jingwan jong ki ka long ban tip kham bniah ïa ka rukom pynïaid jong ka District Council, nangta ïa ka riti dustur bad khamtam eh ïa ki bor treikam ba ka Council ka don ban peit ïa ki Hima, ka synshar khadar bad kiba bun ki bynta.
“Ki la pynpaw ïa ka jingkmen haba ngi ïoh ban ïa phylliew jingmut lang bad ki namar ngi ruh ngi tip khambha shaphang ka rukom treikam jongki hangthie lyngba ka Zilla Panchayat Council bad ki ruh ki tip khambha shaphang ka KHADC bad ïa ka bor ba ngi ïoh na ka Khyrnit kaba Hynriew jong ka Riti Synshar jong ka Ri,” la ong u CEM.