Nongstoiñ, Ïaiong 23: Ka ophis jong ka Civil Defence Eastern West Khasi Hills District, kan pynlong ïa ka mock exercise halor ka jingshah wan hiar thma ha ki nongshun, kaba long na suiñ bad ruh ka blackout lane ka jingpynlip ïa ka bor ding elektrik kaba 2 minit ha ka janmiet jong ka 24 tarik u Ïaiong 2026 ha ki bynta jong ka sor Mairang.
Kane ka mock exercise lane ka jingpyrshang kan long kum shibynta ban pynkhreh lypa, kumno ban leh lada jia shisha ka jingshah wan hiar thma. Ka mock exercise kan sdang da ka jingpynpah siren ha ka por 3 baje janmiet jong ka 24 tarik ka ban neh kumba 3 haduh 4 minit ei ei, kum ka dak ka jingmaham ïa ki paidbah halor ka jingshah wan hiar thma na suiñ, ba ki dei ban shongkhop bad rieh ïalade ha ki jaka kiba long shngaiñ.
Hadien kane yn pynbud pat sa da ka drill jong ki search and rescue team, ka kynhun kaba wad bad pyllait im ïa ki briew kiba shah lynshop ha kane ka jingjia. Ïa kane yn leh ha Mairang Presbyterian Higher Secondary School bad ha Khatsaw Phra College, Mairang, kynthup ïa ka fire drill ne ka jingpluh ding ïa kaba yn leh ha Circuit House Lumsohkhlur Mairang, ha kaba yn ïashim bynta da ka kynhun Civil Defence & Home Guards bad ka Fire & Emergency Service, Mairang.
Ha ka por 4 baje janmiet kan don biang ka jingpynpah siren da ka tnad Civil Defence, kum ka dak ban pyntip ba la lah ban tem ïa ka jingshah hiar thma ha ki nongshun. Hynrei, ha ka por 6.59 janmiet jong katei ka juh ka sngi, kan sa don biang ka jingpynpah siren kaba maham biang ïa ki nongshong shnong, ba ka la don biang ka jingshah hiar thma na suiñ.
Ha kane ka por la kyntu ïa ki nongshong shnong kiba hap hapoh ka sor Mairang, ba ki dei ban pynlip ïa ka bording elektrik ha ki ïing jong ki, ka ban neh tang 2 minit bad hadien jong kane.Yn pynpah biang ïa ka siren kum ka dak ka jingpyntip ba ka mock exercise ne ka jingpynlehkai ka la kut.
Ha kaba ïadei bad kane ka mock exercise, la kyrpad ïa ki paidbah nongshong shnong jong ka sor Mairang bad kiwei, ba kim dei ban sngew lyngngoh ne ban sheptieng lada ki ïoh sngew ïa ka jingpah bunsien jong ka siren bad ka jingmareh ki kali kit nongpang bad ka jingshong dum ki shnong khlem bording elektrik kumba ar minit. Namar kane ka dei tang ka jingpyrshang jong ka tnat civil defence bad kiwei, ban pynkhreh lypa kumno ban ïada ïa ka ri bad kumno yn leh lada jia shisha ka jingshah wan hiar thma ha ki nongshun.
