Nongpoh, January 20: Ka Meghalaya Pradesh Congress Committee ryngkat ka Ri Bhoi District Congress Committee ki la pynkhreh shaid ban pynbit pynbiang ne ban pynphuh pynphieng da ki rong ki rup na ka bynta ban pdiang burom ïa ka jingwan ïuh kjat u Rahul Gandhi ha ka jylla Meghalaya.
Kane ka jingwan ïuh kjat u Rahul Gandhi ha ka jylla Meghalaya kan long ha ka 22 tarik u Kyllalyngkot 2024 ban sa pynlong da ka jingïalang kaba heh ha Madan Pahamsyiem ha Nongpoh.
Kane ka jingwan ïuh kjat u Rahul Gandhi ha ka jylla Meghalaya ka dei shi bynta ka thong jong ka Congress party ban kren ne pynpaw paidbah halor shibun ki jingshah khñiot beit ki paidbah ba la tip ruh kum kata ka ‘Bharat Jodo Nyay Yatra’ ha kaba ha ka ktien Khasi la tip ruh kum ka jingïaid kjat na ka bynta ka jingïatylli bad ban ïa khun ïa ka hok jong ki paidbah hapoh ka ri India.
Kumba la iohi ne sakhi, ka Meghalaya Pradesh Congress Committee ryngkat ka Ri Bhoi District Congress Committee ki la shim khia bha na ka bynta ban pynkhreh pynkrum bad ruh ban pynriam pynbeit da ki rong ki rup la ka long naduh na Khanapara shaduh sha Nongpoh ba la sih ïa ka lama jong ka Congress ryngkat ki jingpynriam pynbeit ïa ka madan Pahamsyiem na ka bynta ban pdiang burom ïa kane ka jingwan ïuh kjat u Rahul Gandhi kum u nongïalam bahkhleih duh ka party Congress hapoh ka ri India.
Kumba la pynpaw da ka Meghalaya Pradesh Congress Committee bad ka Ri Bhoi District Congress Committee, kane ka Rahul Gandhi’s Bharat Jodo Nyay Yatra ka dei shi bynta ka thong jong ka party Congress ban pynshai sha ki paidbah ka ri, kaba dei halor shibun ki phang kiba ktah ïa ki paidbah ka ri.
Ki katto katne ki phang ba la pynpaw, ba u Rahul Gandhi un sa kren paidbah ha katei ka sngi ka dei ka jingpyrshah halor ka jingkiew dor palat ki mar ki mata ha ka jingsynshar ka sorkar BJP, kaba la ktah ïa ki duk ki rangli, ka jingïakhun pyrshah halor ka jingshah ktah ki duk ki rangli, ka jingbym don ka jingïaburom ïa ki niam bapher bapher hapoh ka ri, ka jingshah thombor ki longkmie bad kiwei kiwei ki phang ba kum ka party Congress kan ïakhun pyrshah ban dei ban ïa long lang kumjuh hapoh ka ri (Equality) bad ban ioh ïa ka jingbishar kaba khlem da noh shiliang (Justice).
