Pynkhlaiñ ka Congress da kaba lum ïa ka jingïalang paitbah ha Langja

Nongstoiñ, Naiwieng 19: Watla ka jingpynlong ïa ka election MP & MDC ka dang kham shim por, hynrei ka Rambrai Jyrngam Block Congress Committee, ka la sdang ban pynkhlaiñ ïa ka party, da kaba pynlong ïa ka jingïalang paitbah ha ka shnong Langja ha ka sngi saitjaiñ ba la dep. Katei ka jingïalang kaba la pynlong ha katei ka sngi ka dei tang na ka bynta ka Rimuliang zone kaba kynthup ïa ki khatwei tylli ki polling station.
Ha katei ka sngi la pynlong ïa ka ka jingïalang ha madan shnong Langja ha kaba la pynïaid da u bah K.P Lyngkhoi president ka Congress Rimuliang zone, ha ryngkat ka jingïadonlang jong ki nongïalam ba hakhmat jong ka Congress na ka jylla, ba kynthup ïa u bah Charles Marngar MLA ka Mawhati constituency, u bah Emanuel Badwar secretary ka MPCC Youth wing, u bah Bormanding Nonglang president ka West Khasi Hills District Congress Committee u ba dei ruh u kyrtong MDC na ka Rambrai Jyrngam constituency ha ka MDC election ban wan. Kiwei pat ki nongïalam ka party kiba la ïapoi ki long u president ka Youth wing jong ka West Khasi Hills bad kiwei kiwei.
Ha shuwa ban pynlong ïa katei ka jingïalang la dep pynbna ba u ma Vincent H.Pala MP ka Shillong Parliamentary seat u ba dei ruh u president ka Meghalaya Pradesh Congress Committee, un wan ban ïadon ryngkat hynrei na ki daw bym lah kiar utei u MP um shym lah shuh ban wan bad ka la pynlong ïa ki paitbah ba kin sngew buhkhoh bad bynñiaw haduh katta katta.
Ha katei ka sngi la ïoh ruh ban pynskhem ïa ki nongkitkam jong ka Rimuliang Mahila ba kynthup ïa ka kong Haimilis Nongsiej kum ka president ryngkat kiwei pat ki nongkitkam. La pdiang burom ïa ki longkmie kiba dei ki nongkyrshan ba radbah jong u kyrtong shimet jong ka Rambrai Jyrngam ha ka election MLA ba la dep, kiba la wan ban pynïasoh bad ka Congress ba kynthup ïa ka kong Joy Marweiñ na Mawphansyiar bad ki nongbud jong ka bad la pynskhem ïa ki da u bah Charles Marngar.
Hadien ba la dep ban pdiang burom bad pynskhem ïa ki nongkitkam jong ka Mahila bad kiwei pat, la ïoh ïa ka jingkren na ki u president ka Congress Langja Primary unit, u bah Marbor Lyngkhoi secrtary ka Youth wing Rimuliang zone bad kiwei kiwei.
Kitei ki nongïalam ka Rimuliang zone haba ai jingkren ha katei ka sngi, ki la ong ba ha ki snem ba mynshuwa haba ka Congress ka dang bat ïa ka bor synshar ha ka jylla, ym ju don kino kino ki aiñ kiba ktah ïa ka imlang sahlang. Hynrei naduh ba ka Congress kam shym don shuh ha ka bor, tang ki jingklumar suda la jan man la ka sngi. Kumta ki la kyntu ïa ki paitbah ba kin phaikhmat sa ka Congress ha ka election MP bad MDC ban wan.
U bah R.R Kharbuli ha kaba u la ong ba ha kine ki sngi kam pat dei ka por ban kren ïa ki ishu bad ki mat trei kam jong ka party, hynrei ka jingpynlong ïa katei ka jingïalang ka dei tang ka jingsdang ban pynkhlaiñ ïa ka party bad ban pynsngewthuh sha ki paitbah kumno ba kin jied ïa u MP ha ka election ban wan. U la ong ruh ba ha une u snem ban wan lada jia ba kam don kano kano ka jingpynbna na ka sorkar ba kan don ka jingphiah ïa ki MDC constituency, kan dei ka snem ba ki paitbah ki ïoh ban thep vote arsien ha u juh u snem.
U bah Charles Marngar MLA ka Mawhati ha kaba u la ong ba dei tang ka seng Congress ka party kaba don ïa ka jingieit ba kyrpang ïa ki paitbah ka thaiñ shatei lam mihngi bad ka bym ju tuklar ïa ki hok longtrai jong ki paitbah ha ka jylla la kalong ha ka ktien ka thylliej, ka riti ka dustur bad kiwei kiwei.
Nalor kata u la ong ba lada jia ba ha kane ka MP election ban wan lada ka Congress kam lah ban wan ha ka bor synshar ha ka ri India, yn ym artatien ei ei ba ki paitbah kin sa ïakynduh ïa ki jingeh kiba kham khraw, namar kumba ngi la ïohi ba ka jingthmu jong ka sorkar BJP ban pyntrei kam ïa ka Uniform Civil Code. U la kyntu ïa ki paitbah ba kin ai lad biang ïa ka Congress sa shisien pat ba kan synshar ha ka jylla bad ha ka ri India, khnang ban ka shongsuk shongsaiñ kan wan phai biang.