Khliehriat, Naiwieng, 19: Kawei ka samla na ka shnong Mynthlu kaba hap hapoh shnong Laphet, East Jaiñtia Hills District ka la pynpaw ïa ka jingsngewsih halor ka jingshah thok pisa haduh T1. 30 lak ha uwei u briew uba la ai kyrteng ha Facebook kum u Dakermi Shadap bad u Kes Shadap.
Katkum ka jingïathuh jong kane ka samla ka bym shym la kwah ban pynpaw kyrteng, utei u briew u la kular ba pynïoh kam Sorkar ïa ka bad u la kam ruh ïalade ba u trei kum u Shipai.
Ka la ong ba ka pisa ba ka la ai ka la don mynta shiphew bnai bad haba ka la pyrshang ban telephone pynban wat ïa u number phone jong ka ruh u la Block noh. Kane ka samla ka la pyni ruh ïa ka dur ba u Dakermi Shadap u la buh ha Facebook ha ka riam shipai.
Ka samla kaba la shah pynngop, ka la ïathuh ïa kane ka jingjia ha u samla Lamdame Shangpliang ha kaba u la ai por shitaiew ïa u Dakermi Shadap ban pynphai ïa ka pisa hynrei lym kumta un leit mudui noh sha ki Pulit.
Ha kajuh ka por, u samla Lamdame u la kyntu ïa baroh ba kim dei ban shu ngeit klumar bad ong ruh ba hashwa ban shah pynngop ki dei ban da wad shwa ïa ka jingshisha bad u la kyrpad ruh ba lada don mano mano kiba don jingtip shaphang u Dakermi Shadap kin sngewbha ban pyntip sha u samla Lamdame lyngba ka Facebook Account jong u.
