Man ba nga leit sha ki shnong kiba kham jngai na sor Shillong nga shem ba kiba bun ki khynnah kiba dang 10-12 snem ki la sdang ban trei ha lyngkha lane ki hap pahara bad ap blang ap masi. Kane ka mut ba ka hok jong ki ban leit skul bad ban ïoh jingnang, jingstad la knieh noh na ki. Hato ngi ju kylli mo ba ka lawei jong kine ki khynnah kan long kumnoï Ka jingpyrkhat jong ki kmie ki kpa ba haba buh skul ïa ki khun dei beit ba kin ïoh kam Sorkar ka long kaba bakla palat. Ka jingnang jingstad ka ïarap ïa ngi ha kiba bun bynta. Ka jingnang jingtip ka plie lad ïa ki khun samla ba kin pyrshang ban trei ïa ki kam kiba bun jait kiba mih ha kane ka juk mynta. Haba la don ka jingnang jingstad ka lad ka plie ïa ki samla ba kin trei ym tang ha kane ka jylla hynrei wad sha kiwei pat ki jylla kane ka ri baïar bad wat shabar ri ruh hi.
Ka jingnang jingstad ka long kum ka stieh bad ka wait kaba ïarap ïa ki khun samla ba kin prat lynti da lade ïalade khlem da shaniah than tang ha ka Sorkar ban plie ïa ki lad ai kam ai jam. Haba lah biang ka jingnang jingstad watla ngi rai ban long ki nongrep ruh ngin sa long ki nongrep kiba sngewthuh ïa ki rukom rep kiba kham thymmai bad kiba lah ban kham pynseisoh ïa ki lyngkha ki bri jong ngi namar ngi leh da ka jingsngewthuh bad jingtip ïa ki lad rep kiba mynta bad kiba long katkum ka jingshem ki saïantis ha kane ka juk.
Man ba nga kylli ïa ki heprit balei ba kim leit skul shuh bad ka jubab kaba nga ïoh ka long, “bym lah kyrshan shuh na iing,”…”ba don tang i mei, i pa i lah phet”…..” “ba hap ap para ha iing.” Pyrkhat lem seh kumno kine ki bapli ki heprit kin ïohlad ban ïohkam ïohjam bad ban lait na ka jingduk kaba ban jur ïa ki.
Ha kane ka jylla Meghalaya mynta ki don katto katne kiba heh spah bad kiba kwah ban kam lut ïa ka bneng ruh lada lah. Don pat kiba la duk tasam ba tang ban phah skul ïa ki khun ruh kim lah shuh. Kine ki heh spah kiba la ïoh kamai na ka mariang jong ngi kum ki trai par dewiong, ki trai par mawshun bad kito kiba tih bad khlong lut ïa u maw u shyiap na ka mariang ki la kiew rasong ka spah hynrei kim don jingkitkhlieh lem na ka bynta ki baduk ba rangli. Ha kiwei ki jylla pat ki nongkhaii kiba ïoh jingmyntoi na ka mariang kum ki Tata bad ki Birla nalor kiwei pat, ki ai shibun bah ka jingïarap ïa ki briew kiba shong ba sah sawdong ki jaka na kiba ki tih ïa ki mar spah khyndew. Ïa kane ki khot ka Corporate Social Responsibility (CSR) lane ka jingai kylla lem sha ki nongshong shnong kiba hajan ki par dewiong lane par nar bad kumta ter ter.
Bun ki skul jong ngi kiba jngai na sor Shillong kim da long kiba ai ïa ka jinghikai ka ban pynlong ïa ki khynnah ba kin sngewtynnad ban wan skul. Ka don ka jingong ba kito ki bym ïoh kam sorkar ne kiwei pat ki kam kiba kham heh jingsiew ki kylla long nonghikai. Na kata ka daw ki briew kiba tbit shisha ban long nonghikai kim noh mynsiem ban long nonghikai. Lehse halor kane ka bynta ki nongpynïaid shnong ruh ki don ka jingkitkhlieh kaba khia namar ki dei ban leit peit hateng hateng ïa ki skul shnong ban peit lada ki nonghikai ki wan thikna ne em bad kumno ki hikai ïa ki khynnah.
Ban hikai ïa kiwei ngi dei ban long kiba lah biang bha ka jingshemphang ïalade bad kawei ka bynta kaba donkam eh ka dei kata ka “art of communication,” lane ka jingstad bad shemphang kumno ban pynsngewthuh ïa kita kiba ngi hikai da kaba pyndonkam da ki lad bad ki buit har rukom. Bunsien ki khynnah hapoh klas kim sngewthuh ïa ka jingtbatai jong u/ka nonghikai hynrei ban kylli pat ki tieng. Ki nonghikai ki dei ban sngewthuh ba ka kamra klas ka dei ka jaka ha kaba ki khynnah ki lah ban buh kano kano ruh ka jingkylli khlem da tieng bad riej. Ïa kata ki khot ha ka ktien phareng, “Critical Thinking,” kaba mut ba ki khynnah ki pyndonkam ïa ka bor pyrkhat jong ki bad namarkata ki mih ki jingkylli ha ka jabieng jong ki. Lada ki khynnah kim buh jingkylli ka long namar ba ki khlem sngewthuh eiei ruh ïa ka jinghikai ki nonghikai.
Ki kmie ki kpa ruh ki dei ban don ka jingkitkhia bad ban don ka jingïadei kaba jan bad ki bor pynïaid skul. Hynrei ki bor pynïaid skul bunsien kim ju kwah ban ïohsngew ïa kano kano ka jingkynthoh na ki kmie ki kpa. Haba kam don ka jingïatrei lang bad ki kmie ki kpa, ki nonghikai bad ki bor pynïaid skul te khlem pep ka jingduh kaba khraw eh kan long ïa ki khynnah ki bapli. Manla ka skul ka don la ka Managing Committee (MC), hynrei kane ka MC ka shu ïakynduh teng khat eh bad ki dkhot hangto ruh imat kim sngewthuh ïa ka jingkitkhlieh lajong. Lada ka MC ka khlaiñ kata ka mut ki nonghikai ruh kin pyrshang ban pyntbit ïalade bad kin ym shu hikai tang ban dep.
Lada ka Sorkar, ki paidbah bad ki MLA/MDC kim kitkhia ïa ka pule puthi ha kane ka jylla jong ngi te nga ïohi ïa ka lawei kaba dum tliw tliw namar khlem ka jingpule bad jingtip shaphang ki jingjia kylleng ka pyrthei ngin ym pah ban kiew ha ka pyrkhat pyrdaiñ. Ka por ka la dier mynta hynrei ngi dei ban ïaleh katba lah ban pynduna ïa ka jingpynpep skul ïa ki heprit jong ngi. Ki longkmie ruh ki dei ban kham pyrkhat ban ym shu kha ïa ki khun sha ka pyrthei khlem da lah ban pynbit pynbiang pat ïa ki. Ban ïoh khun ka long kaba suk hynrei ban buh skul bad pynbit pynbiang ïa ki ka dei ka jingeh kaba khraw. Ki kynthei ki lah dei ban da pyrkhat bha ïa ka lawei kaba kumno ki ai ïa ki khun jong ki.
