Mawkyrwat, ‘Naiwieng, 19: Ka National People’s Party (NPP) jong ka Mawkyrwat Block, South West Khasi Hills District ki la ïa shong pyrkhat ha ophis treikam jong ka party ha Mawkyrwat kumno ban pynkhlaiñ shuh shuh ïa ka party happoh ka distrik baroh kawei na ka bynta ban pynkhreh ïa elekshon Lok Sabha bad ïa ka elekshon MDC na ka bynta ka KHADC bad ka JHADC.
Ha ka jingïalang, la ïadonlang President ka NPYF South West Khasi Hills District u Bah Kitborlang Nongrem uba dei ruh u State President jong ka NPYF ryngkat u General Secretary jong ka NPP South West Khasi Hills District u Bah Working Sangriang, ki ‘riew rangbah bad kiwei ki dkhot jong ka Party.
U Bah Kitborlang haba kren sha ki lad pathai khubor hadien ba la wai ka jingialang u la ong, “kum ka party ka don ka jingkyrmen ban jop biang ha kine ki ar tylli ki elekshon ki ban sa wan bad ka jingïakhun ka don ha manla ka elekshon bad kiwei pat ki party.”
U la ong, watla ki briew ha kine ki sngi ki la sdang ban khihwin bad ka Voice of People’s Party (VPP) hynrei haba phaidien pat ïa ki seng saiñpyrthei bapher bapher ha rilum Khasi kata naduh u snem 1998 haduh u snem 2023 ki la mih shibun ki seng ‘riew lum kiba pynkhih win ïa ki khun samla bad ïa ki paidbah jong ka ri Khasi hynrei kita ki party ki la sakma noh tang shiteng por. “
“Ka jingkhih win jong ki paidbah ha ka Voice of People’s Party (VPP) ha kine ki sngi ka long thik kum ka jingkhih win ki briew ha ka por ba dang mih thymmai ka KHNAM,” ong u Bah Nongrem.
U la ong ba um lah ban tip kumno ka Voice of People’s Party (VPP) kan long nangne shakhmat hynrei kyrmen bad kitbok ba kane ka party ba kan ym jia kumba long kiwei pat ki party ha kaba wat tang ki MDC ne MLA ruh kim don shuh haduh mynta.
