Shillong, Naiwieng : Ka long kaei kaei kaba sngewtynnad ban ïohlad ban ïa shongkai peit baiskop bad ki paralok barim bajah shisien lano, khamtam ha kum kane ka sngi ba kyrpang jong ki nongpathai khubor ha kylleng ka ri.
Kane ka la jïa ha ka sngi Palei jong ka taïew ba la dep, ka 16 tarik u Naiwieng 2023, bad namar ba la pynkynriah noh ïa ki program jingrakhe ïa ka, kumta u bah Raphael Warjri u la tyrwa ba ngin ïa peit noh da ka phlim jong u kaba la ai kyrteng “Apot.”
Shuwa ba ngin ïa ngam kham jylliew shaphang kane ka phlim, to tip ba u bah Raphael udei u barikor uba la ih bha ha ka kam jong u, namar ba ula don ha kane ka laiñ naduh ki snem phraphew khlieh.
Ha kaba ïadei pat bad kane ka phlim, “Apot” u bah Raphael, kum u Director, ula ïathuh ba kane kadei hadien “da ki phew snem ba khlem ïoh lad ïoh kabu shuh ban shna durim na ka daw ba jynjar ban pynkohnguh ïa ki briew ne ki seng ki ba parum pareh ha ka kamai kajih kynthup lang ia ka sorkar,” ba kin bei pisa.
U bah Raphael ula ong ba ha u snem 2017, “dang shu dep ban pyninam ïa ka sawangka ‘Ka Ding Ka Jingieit’ la sdang ban jied ia ki puron na ka bynta kane ka durim, hynrei u lyoh uba dum u la taplup ïa ka shlem mattithaw jongngi, ha ba arngut ki riewtbit ki la khlad lang ha kajuh ka khyllipmat na ka daw ba la lynsher hi ka mariang.”
Kita ki riewtbit ki long u Bah Paul Lyngdoh Mairang bad ka Crystal Gayle Kharnaior ki ba la shah banbor ha u diengbah u ba la khyllem ha ka 12 tarik u Nailur 2017 ha khmat ïng jong u Lat ka jylla.
Kadei ha ka ba sdang bnai jong ka snem 2018 ba la pynkhreh nadong shadong na bynta ka “Apot” ka khana shaphang u ‘Tiewlarun, kaba phalang shaphang ka jingim ba shisha bad ka ba khiathew ha ka sohpdung jong ka khana.
Ka daw bah ba la jied ïa ka khana shaphang u ‘Tiewlarun ka don bun syrtap, kata ban synñiang ïa ka imlang sahlang bad ïa ka jylli pynmih durim ha jylla, da ka jingthmu ban kynpeiñ ïa ka pyrkhat briew kaba shongper bad kaba kdew ïa ki khanatang ne puriskam kumba la khana ha ka jingthoh.
Kadei ka khana shaphang u Het bad ka Shatai Rande, ki khun swet ba shem lanot na ka daw jong ka khlam bad ba ka Shatai ka la kum nguid ïa ka pylleng bseiñ na u japung ba la wanlam u hynmen, u Het ha ka khyllipmat ba ki la ïa sliang um palat.
Katkum ka puriskam tynrai, kane ka phlim ka phalang ka saiñnia ka kdew da ka pharshi ha ki tienkren ba ka don ka sang ka ma ba kita ki arngut shipara kiba la ïa shongkha katkum ba kyntu ki bor ka mariang.
Kane ka phlim ka long ruh ka jinghikai ïa ka imlang sahlang da kaba ktik ïa ka janor, ban pyrkhat jylliew bad sngew khia halor ka jinglong jingman ha ka longbriew manbriew.
U ‘tiewlarun dei u syntiew ba la mana hynrei ha ka jingshah pynshoi bad shah khring ka Shatai, ba la shim ïa ka bynta da ka Darihun Marbañiang, ka la kheit ïa u syntiew baphuh itynnat, wat haba la mana pyrshah da u hynmen jong ka, u Het Rande, ba la shim ïa ka bynta da u Synranki Najiar.
Ka Shatai kala pynkheiñ hukum bad khlem suitñiew ïa ka sneng ka kraw ba la mana tyngeh ban ym bit ban kheit ia u ‘tiewlarun, tat haduh ba ka la ngat ha ka apot ban shah thar ha u shiah bseiñ, uba ka la pun ha la kpoh lajong khlem da tip. haba u bseiñ u la mih na shyntur ka Shatai, kloi lan la pyn1ïap noh u hynmen, u Het bad u la leit bret ha tynrai jong u jyntang ‘tiewlarun.
Ka khana ka kyrsoi ha ka jingim raitoi kita ki arngut shipara kiba la shah ieh lyndet ha la ka imlang sahlang na ka daw ba wan hapshop ka khlam kaba la sar naphang 1ïa ka jingim briew ha baroh kawei ka shnong kynthup ïa ka longïng longsem jong kita ki shijur ki shipara u Het bad ka Shatai.
Kita ki shijur ba dang khynnah ki la her mynsiem bad khaweit ban khmih ïa kata ka khlam ha la shnong bad ki la phet krad shisyndon, khlem da lap ne shem shuh ïa kino kino ki parabriew, wat haba ki la shang makia haduh ba la jlan hi jlang ki sngi ki ïa.
Katba ki dang san dang heh ha ka ryta ki la sdang ban sngewthuh ïa ka raiñ ka rem, ka tiplem tipsynei, ka tipkur tipkha, bad wat ia ka longshynrang longkynthei, ka longpun longkha, ka poikha poiman tat haduh ba la lynshop ka sang ka ma.
Khala khala ki la ïamrem ïa la ki kam khlemraiñ khlemrem da ka ba ki la babe bad lam shaduh u pud ban hap ïakhlad bad kyndiah iwei-na-iwei bad sah tmang sah kynjah ha la marwei marwei.
Phewse, ka la jia ryngkhat ba u khunsyiem u ba dang leit beh mrad sha khlaw, u la lap pynban ïa ka thei bhabriew kaba thiah pang ha la trep khlem don ba sumar ne phikir ïa ka haduh ba la poi ha tmier ka jingïap.
U khunsyiem u la shohkhmat ïa kata ka samla briew kaba paw sngur bad shida ka durkhmat, kat haduh ba u la khohreh ban sumar sukher ïa kata ka bapli ka sangsot. ka la long ka lynti ïaid jong ka jait syiem ban kitkhlieh ïa la ki khun ki hajar ka ba la byrshem ruh bad ka ibha shoh jingieit ha lade shimet.
Katba dang ïaid ki sngi kata ka samla ka la nangkoit bad phngaiñ ka dur ka dar haduh ba u shlan ban tyrwa ia ka ban poikha poiman.
Wat lada ka Shatai ka angnud ban phla ia la ka kupar jot ba kala mad ha la ka jingim, hynrei u khunsyiem u la thame ha ka dur bhabriew jongka da kaba u la kut jingmut ban pyllait ïa ka Shatai na ka sah tmang tang marwei ha ka apot sepsngi khnang ban shngaiñ ka jingim jong ka.
Ym lah ban kdew bad kynthoh than halor ka jing thaw bad pynmih ïa kane ka phlim Apot, namar ba kadei ka khana kaba donkam eh ban buh ha ka thup sah jingkynmaw jong kane ka puriskam.
Lah ban ïohi ba ka rukom pynkhreh pynkhrum ka la long kaba janai naduh ka jingpynbiang ïa ki jaka lane ka “set,” ka jingringdur bad jingringsur, ka dialogue, hynrei thikna, ba kan ym don ka jingïohnong namar kam dei ka phlim lane durim kaba ïaid ïew.
Ki don ki jingbakla, ym lah ban len, kum ha kaba u Syiem u sah kumjuh katba ki arngut shipara pat la ïohi naduh ka por ba ki dang kham khynnah.
Katto la pynkhreh, ha ki jaka kiba itynnad ka mariang, ban ringdur ïa kane ka puriskam, sngewsih pat ba kadei ka phlim ha ka black & white namar lada pyllait beit da ka color, kan kham itynnad shuh shuh.
Ka riam ka beit tynrai jong baroh ki tyngshop ki puron ka la batai shai hi ba kadei ha ki por barim.
