Ka kam shangkai pynngngad ne Tourism ka karkhana ban kyntiew ïa ka kamai kajih ki trai shnong

Da u Bah Staising Kharbteng

Ka Rilum jong ngi ka don ïa ka Mei mariang ba itynnad
bad pynïap-bieij ïa ki briew na shabar ban wan ïuhkjat kum ki nongwan jngohkai pyrthei ne nongwan shangkai pynngngad ban sakhi ïa ki lum ki wah, ki kshaid, ki krem bad kiwei kiwei ki bynta. Ka kam wankai pynngngad da ki briew na shabar ka jylla bad bar ri ka dei ka karkhana ba khraw ban long kum ka pliang ja ïa ki phew hajar tylli ki longiïng ka Bri u Hynñiewtrep jong ngi.
Ka nuksa ki katto katne tylli ki jaka ba khring ïa ki nongwan shangkai pynngngad ïa ka jingnoh synñiang ban kyntiew ïa ka kamai kajih ki long. Ka shnong Mawlynnong ba la tip kum ka shnong bakhuid tam ha ka dewbah Asia ka ai kam ïa ki trai shnong ban buh ki ïingsah ne homestay, ka jinglum ïa ka bai rung ne entry fee, ki samla ki long kum ki tourist buddy ne nongïalam lynti, ki longkmie ki seng ïa ki dukan bam bad die ïa ki mar ki mata bad kiwei kiwei ki lad kamai. Ha syndah kane ka jaka ka don ka Living Root Bridge ne Jingkieng Jri Ba im. Haba ki briew ki leit ha kane ka jaka ki hap ban siew ka bai ïeng kali ne parking fee, ka bai-rung , ka bai wai ïa ki dieng ban ïarap haba ïaid na bynta kiba la kham noh ka rta, ki jingbuh ïa ki dukan.
Ha shilynter ka lynti sha Mawlynnong ki don ki jaka bam ba ki nongwankai ki lah ban bam bad kane ka ai kam bad kyntiew ïa ka ïoh ka kot. Haba poi sha surok bah Pynursla – Dawki ka don ka jaka bam ba pawnam ba la tip kum ka Bri War Resort kaba heh. La sakhi ba ki briew kiba poi sha katei ka thaiñ kim lah ban ïaid lait ïa katei ka jaka bam ba heh bad ia ryngkat kyrdan bad kiwei ki jaka bam kiba lah kiew. Ka long shisha ka jingsarong ïa ka thaiñ haba ki trai shnong ki la lah ban buh kum kitei ki jaka bam ba khring naduh kiba rit haduh ki heh sorkar.
Haba ngi phai sha ka thaiñ Sohra ngi sakhi ba kumno ki trai shnong ki ïoh kamai da kaba lum ïa ka parking fee na ki kali kiba poi da ki spah tylli ha ka shisngi, ki jaka bam ki ïoh kamai na ki briew kiba bam ha ki dukan jong ki, ka bai rung ha ki jaka jngohkai, ki nongñiah kali ki ïoh passenger, ki jaka sah ne homestay kiba plie lad ha ka kamai kajih bad kiwei kiwei ki bynta.
Lada ngi phai sha ka Law Kyntang Mawphlang kaba la pawnam ha baroh kawei ka pyrthei ka plie lad ïa ka Hima ban ïoh ka lad kamai, ïa ki khun samla kum ki tourist buddy ne guide, ki nonglum bai rung, ka jingdon ki homestay bad ter ter.
Lada ngi phai sha kiwei ruh ki jaka jngohkai pyngngad kum sha Laitlum, Krangsuri , Shnongpdeng, Umshit ne Hot Spring, Krem Mawjymbuiñ, Pung Marngar bad shibun kiwei kiwei pat kiba ngim lah jer kyrteng lut ki ai ki lad kamai ha bun ki liang ïa ki trai shnong bad pynlong ban lah ban ïeng ha la ki kjat.
Ki dang don bun tylli ki jaka kiba dang donkam ban pynpawnam shuh shuh khnang ban khring ïa ki briew na shabar.
Ban kyntiew khambha ïa kane ka liang ne tnat ki don shibun ki jingdonkam ban nang pynbha shuh shuh. Ngi donkam ki surok kiba biang ha kylleng sawdong nalor kiba lah don lypa, ki jaka sumar, ki jaka sah kiba biang, ki jaka bam ba paka bad shibun kiwei kiwei ki jingdonkam.
Da shisha ka kam shangkai pyngngad ka ai shibun ki jingmyntoi ne plus point ïa ngi kum ka jylla. Hooid! ngim lah ruh ban len ki lah ban don ruh ki jingshah ktah ne minus point kum ka jingjynjaboh ïa ka jingkhuid da ki briew ki bym don ka civic sense ne jingsngewthuh ban burom ïa ka mei mariang, ka jingshim kabu ïa ka jinglong shida jong ngi bad kiwei kiwei ki jingshah ktah.
Ki don ruh kiba lah ban kynthoh pyrshah haba kren shaphang ka thong ban kyntiew ïa ka kam jngohkai pyrthei hynrei ïa ki jingduna kiba lah ban don ha ka kam wankai pynngngad da ki briew na shabar ngi hap ban pynjanai ban weng ïa kino kino ki bynta kiba ktah ïa ka bha ka miat ki trai shnong. Ki Dorbar Shnong, Dorbar Hima ha ryngkat ki tnat Treikam bapher bapher ka Sorkar ki don ka bynta kaba khraw halor ka kam jngohkai pyrthei ne Tourism bad ban saiñdur ïa ka jingkiew jong ka kum ka lad ban kyntiew ïa ka ki kam pynroi bad ïa ka kamai kajih jong ngi khnang ba ngin lah ban ïeng ha ki kjat khlem da khmih lynti than tang ha ki kam sorkar bad ban long kynrad ha la ka jong ka Ri.