Khliehriat Iaiong 30: Ki pulit jong ka East Jaiñtia Hills District mynta ka sngi ki wanrah ïa uwei u snar nongtuh uba ju tuh pisa na ki ATM, uba kyrteng u Irsad Rumi, 32 sne kyrta uba na ka shnong Mewat, jylla Haryana (Tauru, Haryana), ki pulit ki la ioh kem ïa u myn ha ka 26 tarik mynta u bnai iaiong na Tauru, haryana bad mynta ka sngi ka 30 tarik ki pulit ki la ialam ïa u sha iingbishar District Court ha Khliehriat East Jaiñtia Hills.
La ong ba une u snar nongtuh u dei ruh uba la suba donkti ha kaba tuh pisa na ka ATM jong ka HDFC bank kaba don ha Wapung East Jaiñtia Hills District kaba la jia myn ha ka 14 tarik mynta u nai ïaiong 2026 ha kaba ki nongtuh ki la ioh rong tuh ia ka pisa T9,57,900/ (khyndai lak san phewhynniew hajar khyndai spah tyngka, halor kane ïa ka ejahar la register ha Khliehriat Poilice Station PS Case No. 124(04)2026 hapoh ki kyndon ain U/S 305/324/331/61(2)/112/3(5) BNS bad ka jingtohkit ka dang iaid.
Shuh shuh u kyrwoh khubor ba la phah da u Superintendent of Police East Jaiñtia Hills District, u Pankaj Rasgania, IPS, u ong ba ka jingiohkem ïa utei u snar nongtuh ba tuh pisa na ATM ka dei ruh da ka jingai jingiarap lang ki bor pulit kiba na ka jylla Haryana bad ong ruh ba u Irsad Rumi u dei uwei na ki nong leh kam sniew (criminal gang) ba na Mewat bad uba la donkti ruh ha kaba tuh pisa na ki ATM kiba don ha East Khasi Hills. Ri-bhol, East Jaiñtia Hills and North Garo Hills, kiwei pat kiba ju ïa don kti lang bad u ki dei kiba la shah kem ha ki pulit jong ka Ri bhoi District ba ka dep register ejahar ha Umiam PS Case No. 20(04)2026 u/s 305(a)/331(4)/324(5)/61(2)(b)/3(5) BNS.
Katkum ka khubor ba la pyllait da u SP ka East Jaiñtia myn ha ka 16 tarik iaiong 2026 la ong ba ïa ki nongtuh kiba kyndang tuh na ATM ba don ha shnong Wapung la ioh ring dur ïa ki da ki kor CCTV ha kaba ki la iehnoh ruh ïa kawei ka kali Bolero ba ki tuh bad kane ka la jia myn ha ka 14 tarik mynta u bnai iaiong bad mar mar hi ka kynhun kaba na ka tnat crime scene ka la wan poi sha katei ka jaka ha Wapung ha ka por kumba 12:30 mynmiet synia lem bad ki pulit kiba na ka district bad la pyndonkam ruh da ki ksew syntiat, la lap ba ki nongtuh kiba la phet krad ki la iehnoh ïa ka gas cylinder bad ki tiar ba ki pyndonkam ha kaba ot ïa ka machine ATM bad ha katei ka miet ki nongtuh ki la rong tuh ïa ka pisa ka T 9,57,900 kaba don hapoh ATM.
Shuh shuh, ha shwa kane ka jingtuh na ATM, ki nongtuh ba tuh na kane ka ATM ha Wapung ki la rong tuh ruh ïa kawei ka kali Bolero pickup bad wan da kane ka kali ba ki tuh sha ka jaka ba son ka ATM bad hadien ba ki la dep tuh ïa ka pisa ki la iehnoh ïa ka kali Bolero pickup bad mareh da ka kjat.
