Pynkhie im biang ka MBSG ïa ka jingkongsan ka sawdong sawkun, pynkhuid ïa ki jaka ha Khyndailad
Shillong, Nailur 17: Ka Meghalaya Bharat Scouts bad Guides, ha ka sngi Palei kum shi bynta jong kawei na ki jingïalehkai ba dang ïaid jong ka National Level Training of Trainers (TOT) ha youth led action on climate change (YLACC) Project kaba la pynlong da ka Bharat Scouts bad Guides, National Headquarters ka la sdang ïa ka jingïalap ban pynneh ïa ka mariang bad ka sawdong sawkun ha ka jylla bad nongbah Shillong.
Ïa kane la sdang naduh ka 15 haduh 19 tarik Nailur 2026, ha kaba ka la ïashim bynta ha ka jingïaid paidbah ban pynkhuid naduh State Headquarters shaduh Police Bazaar ha ka por mynstep da kaba pynkynmaw ïa ka jingdonkam ban sumar ïa ka mei mariang.
Ha katei ka prokram, ka Kong M. Lyngdoh, ba dei ka State Secretary Meghalaya Bharat Scouts bad Guides, Shillong, ka la pynkynmaw ruh ïa ka sngi jong ki nongñiah kali lane ka National Drivers’ Dignity Day, kaba la thmu ban kynmaw burom ïa ki jingnoh synniang kiba khraw jong ki nongñiah kali kamai ha ka ïoh ka kot jong ka thaiñ.
Kine ki nongïashim bynta ki la ai sngewbha ruh da ki jingthung ba dei ki dieng ba dang lung sha ki kali local bad nongñiah tourist ha Police Bazaar da kaba ban jur ïa ka jingdonkam ban pynshongdor ïa ka jingshngaiñ ha ka ñiah kali bad bud ryntih ïa ki kyndon jong ki pulit pynïaid kali haba ïaid ha ki surok.
La bynrap ba ha katei ka prokram, la pynkynthup ïa ka jingpynithuh bad kyrpang ïa ki nongñiah ïa ki bos jong ka STEMS Meghalaya ha State Headquarters, da kaba rakhe ïa ka jingkular jong ki ban ai ka jingïada bad ka shong shngaiñ ha ka leit ka wan na ka bynta jong ki samla pule, ryngkat bad ka jingithuh ïa ki nongñiah jong ka Meghalaya Bharat Scouts bad Guides.
Kane ka jingtreishitom ka pyni ïa ka jingnoh synniang met bad mynsiem jong kane ka kynhun na ka bynta ka jingkit khia ka imlang ka sahlang bad ka jingpyn shai halor ka jingïada ïa ka mariang bad ka jinglong kongsan jong ka sawdong sawkun ha kane ka jylla bad khamtam hapoh ka nongbah Shillong kaba dei ka jaka kaba wan bha kiba jngohkai.