Shillong, Nailur 17: Ka MLA Connect Program kaba nyngkong eh jong ka 28-Sohra Assembly Konstitwensi la pynlong ha ka shnong Sohkynduh ha ka sngi Palei, ha kaba la wan ïa shim bynta na ka shnong Sohkynduh, Rymmai Mawskhen bad Mawbawein.
La pynïaid ïa kane ka prokram da u BDO ka Laitkroh C&RD Block u Bah Wankhrawkupar Kharbuli, ha kaba la ïa shim bynta da u MLA ka Sohra u bah Gavin Miguel Mylliem, u Acting Chief ka Sohra u Bah Mynjurlang Majaw, ki heh jong ka tnad, ki nongsynshar shnong bad ki paidbah nongshong shnong.
Haba kren ha ka jingïalang, u Bah Gavin Mylliem u la ong ba kane ka prokram ka thmu ban pynkhlaiñ ïa ka jingïakren hapdeng ki nongmih khmat ba la jied, ki shnong ki thaw bad ki tnad, bad ban ai ka lad ban sngewthuh ïa ki jingeh jong ki briew.
Ki nongshong shnong ki la pynpaw ïa ki jingeh ba kongsan halor ki jaka sumar, ki surok bad ki lynti shnong kiba sniew, ka jingbym biang ka um dih bad ka jingduh bording man ka por kaba ktah ïa ka jingim bad ka jingïaid lynti ba man ka sngi.
Ki heh ophisar ki la pynthikna ïa ka jingtreikam kaba ïadei bad ki la ong ba ïa ki mat yn sa rah sha ki bor ba halor.
