Nongpoh, Rymphang 29: Ki nongrep, ki nongthaiñ jaiñ, ki nongshna tiar kti lem bad ki samla kiba seng kam lajong mynta ka sngi kila pyninam ïala ki jong ki tiar ki tar, ka bam ka dih bad ki mar rep haka 28th District Level Industrial Exhibition bala pynlong da ka District Commerce and Industries Center (DCIC) Ri-Bhoi District ha Byrnihat.
Ïa katei ka ïew pyninam ba 2 sngi lynter la wan ban plie paidbah mynta ka sngi da u Bah Sosthenes Sohtun MLA ka Jirang kum u kongsan haka jingdonlang u I.Z. Wreang, Deputy Director Industries, Bah E. Dkhar, BDO Umling, Bah H. Decruse, GM, DCIC, Nongpoh, Bah G.S. Langstieh, Functional Manager DCIC, Nongpoh bad kiwei kiwei ki ophisar sorkar.
Ha katei ka ïew pyni nam la wan ruh ban shim bynta da kumba 40 ngut ki samla, ki longkmie kynthei bad shynrang kiba seng kam lajong lyngba ka sap bapher bapher kaba ki don na kylleng ki jaka jong ka Ri-Bhoi District.
Haba kren ha katei ka sngi naka liang u Bah Sosthenes Sohtun MLA ka Jirang u la pynpaw ka jingsngewkmen ban ïohi ba ki khun samla kila kiew sted haka sengkam seng jam lajong lyngba ka sap bapher bapher ba ki don bad kane ka long ka jingai mynsiem ïa kiba bun ki khun samla ha kane ka juk ba mynta.
U la pynpaw ruh ka jingsngewkmen ba ki dukan baroh ki dap da ki tiar ki tar lyngba ka jingtrei shitom ki paidbah bad kane ka dei ka kabu kaba ki khun samla ki dei ban shim ha kum kane ka juk kyrduh kam kyrduh jam ban pyndonkam hok ïaka sap bad ka jingangnud ka jongki lyngba ka jingïarap jong ka sorkar naka tnad DCIC.
