Bthah ka MHRC ïa u SP EKH ban phah ïa ka kaiphod ba bniah halor jingkynnoh shah shoh ki HYC

Shillong, Rymphang 29 : Ka Meghalaya Human Rights Commission (MHRC) ka la bthah ïa u Superintendent of Police (SP), ka East Khasi Hills District ban phah ïa ka kaiphod kaba bniah hapoh ka 15 sngi halor ka jingkynnoh shah shoh u President ka HYC, Riwar Mihngi da u 2nd OC jong ka Pynursla Police Station.
Katkum ka jingpylait khubor na u Secretary ka MHRC ha kane ka sngi Palei la ong, “La dep ban phah da ka jingthoh (Notice) sha u SP ka East Khasi Hills District, ban phah ïa ka kaiphod kaba bniah sha ka Commission hapoh ka 15 sngi.”
Ka MHRC ka la shim ïa kane ka sienjam hadien ba ki nongïalam jong ka HYC Seng Kmie ki la ujor halor katei ka jingjia.
Dei ha ka 26tarik u Rymphang ba ka HYC ka la ujor sha ka MHRC pyrshah ïa u 2nd OC jong ka Pynursla Police Station da kaba kynnoh ba u la ktah kti ïa ki dkhot ka seng kiba kwah ban ujor pyrshah ïa ka jingkhaii beaiñ ïa ki masi sha Bangladesh.
Ïa kane ka jingujor, ki nongïalam ka Seng ki la ujor ruh sha u SP ka East Khasi Hills District.