Nongpoh, Kyllalyngkot 28: Kumba 33 ngut ki nongïalam jong ka TMC ha Mawhati hynin ka sngi kila mih noh naka party ban leit pynïasoh sha ka party UDP ban ai ka jingkyrshan ba pura ïa u Bah Baiahunlang Makdoh u ba dei u kyrtong ka UDP ha Mawhati.
Ïa kitei ki nongïalam ka TMC la pdiang burom mynta ka sngi ha Iewmawlong, ha ïingsah jong u Bah Donbok Khymdeit President ka UDP Ri-Bhoi District, haka jingdonlang ki nongïalam jong ka party UDP Ri-Bhoi District naduh u bah RR Makdoh, Bah RM Shadap, Bah Doris Suleiñ.
Haba kren sha ki lad pathai khubor naka liang u Bah Donbok Khymdeit kum u President ka UDP ha Ri-Bhoi u la pynpaw ka jingsngewkmen kaba khraw halor ka jingkloi jong kitei ki riew rangbah ban pynïasoh sha ka UDP bad lyngba kane ka jingwan pynïasoh jong ki kan nangpynioh bor shuh shuh ïa u kyrtong bad ka party UDP ha Mawhati Constituency ban pynkhreh ïaka elekshon ban jied ïaki nongmihkhmat.
U la ong ruh ka jingwan pynïasoh ha katei ka sngi ka dei shuwa tang ïa ki nongïalam bad kiwei pat ki nongkyrshan kin dang bteng ban pynïasoh sha ka party UDP ha kine ki sngi ban wan sha ki shnong jong ki, bad kane ka long kum ka jingkyrkhu kaba khraw bad ka lad ka lynti ban dang pynkhlaiñ shuh shuh haka jingtreikam jong ka party ha Mawhati bad ha Ri-Bhoi hi baroh kawei.
