5 snem ngi la ïatreilang bad ka NPP, ngi lap ba ka dei ka Party ba pyrkhat tang ïalade: Alantry

Marngor, K’lyngkot 28: U Bah Alantry Dkhar, Vice President jong ka Seng UDP, u la ong ba ki ju don ki jingkren ba ka jaidbynriew Khasi ka ju mlien bha ha ki lai tylli ki jingmlien ba sniew ne ki lai tylli ki K ba ki ju ïa ong, kata ka Khalai, ka Kyiad bad Kynthei. Hynrei mynta ka jaidbynriew kan hap phai sha ki lai tylli ki K bad kita ki long ka Kur, ka Ktien bad ka Khyndew.
U Bah Allan, u la pynpaw ïa kane haba kren ha ka jingïalang jong ka UDP Nongstoiñ Circle kaba la long ha Marngor na ka bynta ban pan jingkyrshan ïa u kyrtong ka Seng, u Bah Polestar Nongsiej. U la ong ba lada ka jaidbynriew ka duh noh ïa ka Kur, ka Ktien bad ka Khyndew kaba mut ka jaidbynriew kan kylla long mraw ha la ka ri kumba ka la jia ïa ki trai ri trai muluk ha Tripura. “Namarkata ka daw ha kane ka kynti ai ngin kyrni ne trei shitom bad pynneh ne pyni ïa kine ki lai tylli ki K ha ka jingmut kaba thymmai”, u la ong.
Shuh shuh u la ong ba u sngew samrkhie ba ki don kiba ong ba ki sngew sarong ba la mih ka NPP kaba dei ka National Party na ka jylla la jong. Hynrei ki paidbah kidei ban tip ïa ka jingshisha ba ka NPP kadei ka Party kaba la mih na Manipur bad ka shap jong ka, kaba dei da ka kot kadei kaba la thoh da ka ktien Manipuri. Kumta u la ong ba kito kiba dang ngeit ba ka NPP kadei kaba mih na Meghalaya ne kiba dang ïa bieit hi ïa ka kot Manipuri, ka mut kim dei hi ruh ban khot ïalade ki Khasi. Shuh shuh u la ong ba ha kine ki san snem ba ka UDP ka la ïatreilang bad ka NPP, u la ïohi ba ka NPP kadei ka Party kaba pyrkhat tang ban biang ïalade khnang ban ïoh ban pynbiang sha kiwei pat ki jylla namar ba kadei ka Seng kaba kwah ban pynïar bad trei sha kiwei pat ki jylla, ym kum ka UDP kaba kwah ban trei beit tang ha ka jylla la jong na ka bynta u paid jong ka jylla. U la ong ruh ba kam pher wat lada kut tang ha Khanapara ruh kumba don ba ong kan sa leh aiu?. “Ka UDP kam kwah ban korbar sha kiwei ki jylla ne ki bynta jong ka ri India kum ka NPP bad lada ngi kut tang ha Khanapara ruh kam don jingpher ei ei”, la ong u Bah Alan, da kaba bynrap ba u pud u sam u kut tang ha Khanapara bad ym donkam hi ruh ban ïa leit tuklar sha kiwei pat ki bynta jong ka ri India, namar ba ka UDP kadei kaba shakri ïa la ka jylla la jong.