16 tarik yn pynlong Common Platform ka DS Tympang Iawmusiang ïa ki kyrtong MLA

0

Jowai, K’Lyngkot 27: Ka Dorbar Shnong Tympang-Iawmusiang, Jowai ryngkat ka Tympang Club, Jowai ki la rai ha kane ka kynti kin pynlong da ka ‘Common Platform’ ïaki kyrtong ki ban ïaleh ïaka Election MLA sha ka 2-Jowai L.A. Constituency bad la pynbeit ban pynlong haka 16 tarik u Rymphang 2023, ha ka por 7 baje janmiet ha Tympang Club Hall.Ka shnong kala shim ïa kane ka rai hadien ba la dep shong pyrkhat sani bha khnang ba kan nym ktah palat ïaka por ki nongshong shnong khamtam kum kiba shong ha kane ka jaka kaba long mar pdeng ka sor Jowai.
Ha ka juh ka por ka shnong ka kwah ban pyndon burom ïaka rukom synshar paidbah da kaba ïoh jingshai naka jingïatai/jingkren ki kyrtong/party naka juh ka rynsan kan long kaba myntoi. Kumta la pynbeit bad la shim ïaka rai baka bha ban pynlong da ka ‘Common Platform’ bad ba yn lah ban pyndep ha ka shisngi/miet ïa kane ka kam.
Na ka liang ka Dorbar Shnong ryngkat ka Tympang Club ki buh ruh ïaki kyndon kumne, yn ailad 30 minit marwei ïaki kyrtong/party ban kren pynshai ïaki nongrim ba ki ïeng ïaleh ïa kane ka Election bad kumjuh ruh hadien ba la dep lut baroh, yn saai pat sa 5 minit marwei ban kren pynkut (Response Time).Yn leh ruh da ka khalai nusib bad kin hap kren katkum ka number baki ïoh ter ter, yn shah tang 10 ngut ki ban synran ïa u kyrtong ha kane ka Common Platform.
Yn shah tang 3 tylli ki kali ki ban wan lang bad ki kyrtong ha kane ka miet bad ïa kiwei ki kali jong ki nongkyrshan ki kyrtong kin hap ban buh shabar u pud ka Shnong. Ym shah ïa kiba buaid tanglang ban rung shapoh ka Hall ha kane ka miet. Na ka liang ka Shnong kan khot ïaki katto katne na ki sengtrei mon sngewbha ban wan sakhi ïa kane ka Programme. Katba ïa ki jinglut baroh na ka bynta kane ka ‘Common Platform’ yn pynlut na ka Fund ka Shnong bad ka Club.

Leave A Reply

Your email address will not be published.