Pyni nuksa ka tnat Civil Defence & Home Guards kumno ban ïarap haba lynshop mariang
Shillong, Rymphang, 18: Ka tnat Meghalaya Civil Defence & Home Guards ha ka sngi Thohdieng ka la pynlong ïa ka jingai jinghikai kumno ban ai jingïarap sha ki parabriew haba wan ka jinglynshop na ki bor ka mariang kum haba khie u jumai bad haba syllad ka eriong erngit ha East Khasi Hills, ha South West Khasi Hills, ha East Jaiñtia bad West Jaintia Hills District kum shi bynta ka jingrakhe ïa ka jingdap 50 snem ka jingïoh jylla bapura ka jylla Meghalaya.
Ïa kine ki jingai jinghikai la pynlong ha ki District da ki ophis jong u Deputy Controller of Civil Defence bad ki District Home Guards Commandant.
Ha kine ki jingai jinghikai la sakhi ruh ïa ka jingïashim bynta pura jong ki nongshong shnong kiba la ïoh jinghikai ruh halor ki jingpynkhreh kumno ban ïada ïalade bad ïa kiwei pat haba wan ki jinglynshop na ki bor jong ka mariang.
Ha East Khasi Hills, ïa ka jingai jinghikai halor ka jingkhie u jumai la pynlong ha ka shnong Mawkasiang da ka jingïashim bynta lang jong ka Dorbar Shnong, ki nongshong shnong bad ki Pulit ka SDRF.
Ïa ka jingai jinghikai ha South West Khasi Hills la pynlong ha ka shnong Mawten. Ha West Khasi Hills ïa ka jingai jinghikai halor ka jingsyllad na ka jingkhie ka eriong la pynlong ha Nongstoiñ ha ryngkat ka jingïatreilang bad ka ophis DDMA, DMHO ha kaba la ïashim bynta lang da ki nonghikai bad ki khynnah skul.
Ha East Jaiñtia Hills, la ai jinghikai halor ka jinglynshop u jumai la Khliehriat bad ha Ladthalaboh, West Jaiñtia Hills District.
Ka Meghalaya Civil Defence & Home Guards Department ka la buh thong ruh ban nang bteng ïa ka jingai jinghikai halor ki lad jingïada sha ki nongshong shnong jong ka jylla khamtam haba jia ki jingwan lynshop na ki bor mariang, ban shna ïa ki lad jingïada hapoh ki shnong ki thaw haba khie ka thma, ban pynkupbor da ki jingai jinghikai pyntbit ban ïada ïa ki mynsiem briew namarba ki paidbah hi ki long kiba nyngkong eh ban ïatakhuh haba wan kino kino ki jinglynshop.
Ban pynjanai ïa ka jingpynkhreh na ka jingwan lynshop ki bor ka mariang na ka bynta ban kynjoh ïa ka Sustainable Development Goal no.13, kata, ka Climate Action ha kaba ka jingpynkhreh kan long kaba kongsan tam.
Ïa kane kajuh ka jingai jinghikai yn sa pynlong ruh ha Garo Hills ha ka 25 tarik mynta u bnai.
Ïa kine ki jingai jinghikai yn sa pynlong baroh shi snem kynthih kum shi bynta ka jingrakhe ïa ka jingdap 50 snem ka jingïoh jylla bapura jong ka jylla.