Nongpoh, Rymphang, 16: Ka Seng Samla Shnong Umlyngkdait kaba dei kawei na ka kynhun kiba ju kyrshan bad ïa trei lang bad ka Dorbar Shnong na ka bynta ban ai ka jingshakri ïa ki nongshong shnong, kane ka Seng Samla mynta ka sngi ka la pynkut noh ïa ka jingrakhe jubili rupa, kaba dei ka jingïaid lyntiba 25 snem naduh ba la suid la shor ïa ka seng samla ha katei ka shnong.
Kum ka dak ba la pynhap pyrda noh ïa kane ka jingrakhe jubili rupa, u president ka Seng Ssmla Shnong ryngkat ki paidbah nongshnong shnong ki la pynhiar noh ïa ka lama rakhe jubili kum ka dak ka shin ba la pynkut noh ïa kane ka jingrakhe ïa ka jublili rupa ka seng samla shnong.
U MDC ka Nongpoh Constituency, u Bah Balajied Rani u la wan ruh ban shim bynta kum u kongsan bad la sakhi lang ruh da ka jingdon lang u Rangbah shnong, u Bah N.S Makdoh, u samla Balawan Marwein, President ka Seng Samla Shnong, ki riew rangbah bad kynthup ruh naduh ki Longkmie, ki samla bad ki paidbah nongshong shnong hi baroh kawei.
Ki nongïalam Jong ka Seng Samla Umlyngkdait ki la pynlong ruh da ki jingïakop bapher bapher kiba kynthup naduh ka Fancy Dress Jong ki Heprit, Ka jingïakop Shad, Jingïakop Rwai bad kiwei kiwei hakaba ki khun Samla ki la ïoh ban ïa shim bynta shitrhem ha kitei ki jingïakop ha kaba ki la ïoh ruh ïaka lad ban pyni ïa la ki sap ki phong ba ki don. Kum ka jingai mynsiem ïaki nongjop, ka Seng Samla ka la sam da ki khusnam sha baroh ki nongjop ha kitei k jingïakop bapher bapher.
Haba ai jingkren ruh ha kane ka sngi kum u kongsan, u Bah Balajied Rani, MDC ka Nongpoh, u la ai khublei kyrpang ïa ki nongïalam ka seng samla shnong kiba la lah ban kynjoh sha ka jingïaid lynti kaba 25 snem naduh ba la seng ïa ka seng samla bad u kyrmen skhem ruh hapoh ka 25 snem ka jingïaid lynti ka seng samla ka la lah ban leh shibun ki kam kiba khraw kiba ai jingmyntoi ïa ki paidbah nongshong shnong.
U la ong ruh kum u nongmihkhmat paidbah u ai ka jingkyrkhu ïa ki paidbah kane ka shnong ba kin dang kiew shaphrang ha baroh ki liang jong ka jingim bad kum ki nongshong shnong ruh ki dei ban ïa trei ryngkat bad ki bor shnong na ka bynta ban wan rah ka jingkylal bad ka roi ka par jong ki paidbah ha ka shnong hi baroh kawei, u la ong.
U la kyrpad ruh ïa ki paidbah ban ïatrei lang bad u bad khlem artatien lada don ka jingïatrei lang bad ka bor shnong, ki paidbah bad ki nongmihkhmat kin lah ban dang kham leh shibun ki kam kiba ai jingmyntoi ne kyntiew ïa ka shong ka thaw.
