Shillong, Rymphang 16 : Da ka thong ban kyntiew ïa ka pule puthi ha ka jylla, ka sorkar jylla ka la phah maramot bad pynbiang ïa ki jingdonkam jan kot hajar tylli ki skul kiba don ha kylleng ki bynta jong ka jylla.
Ha ka jingkren lamphrang jong u Lat ha ka sngi sdang jong ka Dorbar Mangtyngka ha kane ka sngi Thohdieng la ong ba ki la don haduh 208 tylli ki skul Elementary, Secondary bad Higher Secondary kiba la phah maramot ha ka Phase -1.
Shuh shuh la ong ba ki la don pat haduh 111 tylli ki skul kiba la kynthup ban phah pynbha ha ka Phase – II bad sa 1,725 tylli pat ha ka Phase -III.
Nalorkata la pyntip ruh ba ka jingthung kam ha ki elementary school jong ka sorkar la lah ban pyndep pura dang shen. “Ïa ki 996 ngut ki nonghikai ba dang shu thung thymmai la dep ban aiti ïa ki shithi thungkam dang shen ha ka prokram kaba long ha Tura bad Shillong.
Haba ïadei pat bad ka jingpule na ka bynta ki kyrdan kiba kham shajrong, la ïathuh ba ïa ka Shillong Government College of Engineering la dep ban plie paidbah ha u snem ba la dep bad shen kan sa pdiang noh ïa ki samla pule.
Katba ïa ka College of Architecture and Urban Planning ha Tura la buh thong ban pyndep noh ha ki bynta shwa ban kut jong une u snem. Haba ïadei pat bad ka Captain Willamson Sangma Technical University Act la kdew ba la dep ban pynkylla ban pynlong noh ïa ka kum ka State University khnang ba kan lah ban pynïasoh bad ki college. Kane kan dei ruh ka skulbah ba nyngkong jong ka jylla ba ka Meghalaya kan ïoh.
