Jowai, Jymmang 16: Ka Loomkyrwiang Dorbar Shnong ha kane ka 15 tarik u Rympang kala pynlong ïaka jingïakynduh lang naka bynta ki khun ka shnong kaba la long ha Dorbar Hall jong ka shnong, shi bynta na ka jingleh burom ïaka jingdap 104 snem ka Dorbar Hall “Yungwalieh”.
Ïa ka jingïalang la pynïaid da ka Samhakani Laloo, Secretary WWO, LDC kaba la pdiang burom ïa baroh lang, da kaba pynlong ka jingsngap jar ba shipor kum ka dak ban kymmaw burom ïa ki longshwa ka shnong kiba la seng ïa ka shnong bad ïa ka Yungwalieh, la ïoh ruh ka jingduwai ainguh da u S.D. Laloo.
U ma Lammat-oo Laloo, Waheh Shnong haka jingkren uba la pynsngew ïa ka jingïohi jngai jong ki longshwa ka shnong naduh ki por hyndai kiba la ïalam lynti ïa ka shnong haduh kine ki sngi ba mynta, da ka jingkyrmen bad ka jingangnud ban wanrah ïa ka shongsuk shong shngaiñ ka jingbha jingmiat haka imlang ka sahlang.
Ha ka juh ka por ula khot ïa ki khun ka shnong ban ïashonkti lang ha kino kino ki kam jong ka Shnong khnang ba yn lah ban pynïaid shakham ïa ki kam babha jong ka shnong hi baroh kawei.
Nalor kiba bun kiba ai jingkren ha kane ka sngi la ïoh ruh ban pynsngew ïa ka riti treikam jong ka Dorbar Shnong na u General Secretary ïa kaba la dep ban pynjanai ha kiba bun ki bynta.
Ha kane ka juh ka sngi la sam ruh ïa ki khusnam da ki Mememto sha kito ki khun ka shnong kiba shynñiah ha ki kam ba bha, ha kaba la aiti kumjuh ïa ka Song poisa sha ki nongjop haka Lucky Draw ka shnong.
Ha kaba khadduh la ïashim bynta ban pule ïaka Pledge jong ka Dorbar Shnong ha ka jingïalam khmat jong u Daioolang Pakma uba dei ruh u Symbood Waheh Chnong.
