Rah lama ïong ki paidbah ka Nongsning ban pyrshah ïa ki karkhana Coke kiba pynjot ïa ka tyllong um

Khliehriat, Rymphang, 16: U waheh Shnong jong ka shnong Nongsning bad u Waheh Shnong ka Umrasong ha ka 13 tarik mynta u bnai ki la leit ban iakynduh ïa u Member Secretary jong ka tnat MSPCB bad buh ruh da ka jingujor Namar ka jingai license ka tnat Meghalaya Stae Pollution Control Board ïa ki san tylli ki karkhana saiñ rnga dewïong lane ki Coke kiba kyrteng ka M/S M M Minerals, M/S Unique Industry (2nd Chimney), M/s Presidium Breez, M/s Magic Coke bad ka M/S Ioanis Industries Private Limited (Chimney 2) kiba don hajan jong kine ki shnong khamtam ha ka iadei bad kawei na ki coke plant kaba kyrteng M/S Presidium Breez kaba la pynjulor ïa ka tyllong um jong ka shnong Nongsning, halor kane ki paidbah jong ka shnong Nongsning mynta ka sngi ki la mih paidbah da kaba rah ïa ki lama ïong, ki pla card bad pyni ïa ka jingpyrshah jong ki ia ki karkhana coke.
Katei ka jingiaid paidbah jong ki nongshong shnong lem bad ki nongpyniaid shnong ryngkat bad u Waheh Shnong, ka sdang naduh ka lad ban leit sha ka karkhana bad ki la iaid lyngba ïa ka surok khyndew haduh ban da poi ha karkhana kaba dang pyntrei mynta kaba ki paidbah ki pyrshah jur, la ong ba katei ka karkhana ka dei kaba la ioh jingbit ne ioh syrnot NOC na ka Dorbar Shnong Umrasong myn ha u snem 2022, kane ka karkhana ka dei kaba long trei da u bah Edamon Siangshai uba na ka shnong Nongsning.
Na ka liang u Waheh Shnong ba thymmai jong ka shnong Umrasong, u Bah Elias Tlang, u la pynpaw bad ong ba ka dorbar shnong ka la ai ïa ka jingmynjur ban shna iaka karkhana coke, namar ba kam shym la tip ba na ka jingwan katei ka karkhana kan ktah ïa ka shnong ka thaw khamtam ha ka khuid ka suba bad ka lyer ba ring mynsiem bad kam shym poi pyrkhat ruh ba ka jingwan kine ki karkhana kan ktah ruh ïa ki tyllong um kiba don ha u pud u sam jong ki ar Shnong, kata ka shnong Umrasong bad ka shnong Nongsning.
Kumjuh ruh na ka liang u waheh Shnong Nongsning u Bah Dipsing Bareh u la iathuh ba na ka liang ka Dorbar Shnong ka la dep ban buh da ka jingujor naduh u snem 2022 sha u Deputy Commis-sioner ka East Jaiñtia Hills bad ruh sha kiwei kiwei ki tnat kiba dei khmih ïa kane ka kam bad kyntu ruh ba kim dei ban ai license ban shna ïa kane ka karkhana namar kan pynjot ïaka mariang khamtam eh ka lyer ba ring mynsiem bad mynta la iohi synnna ba ka jingdon kane ka karkhana ka pynjulor wat ïa ka tyllong um ruh kaba ki paidbah ki ju pyndonkam um na kine ki tyllong um, shuh shuh u la iathuh ba ki nongshong shnong ki sngew kyndit haba ki iohi ïa ka jingsdang ban pyntrei ïa kane ka karkhana wat hapdeng ka jingpyrshah kaba jur, la sngewthuh ruh ba wat ïa ka CTE ban shna ïa katei ka karkhana ruh dang ioh dang myn ha u snem 2023.
Ki tyllong um kiba shah ktah ka dei ka Umthlu bad kawei pat ka Umdathli kiba don hajan ki karkhana coke, namar ka jingshah ktah jur kine ki tyllong um bam, ba pyndonkam ki paidbah, ki tei ki ar tylli ki Dorbar Shnong ki la sngewkhia haduh katta katta bad ki kwah ban pynduh pyndam noh shisyndon ïa ka karkhana coke kaba don hajan kitei ki tyllong um.