Pynbna u CM ïa u kyrtong 2023 na ka Mowkaïaw

Jowai, Nailur 22: U Myntri Rangbah jong ka sorkar jylla u Conrad K. Sangma uba dei ruh u National President ka National People Party (NPP) mynta ka sngi ula wan ban pynbna ïa u kyrtong na ka bynta ka Election 2023 na 4 Mowkaïaw Constituency ïa u ma Habahun Dkhar uba dei ruh u MDC jong ka 13-Saphai Constituency.
Ha kane ka juh ka sngi la pynskhem ïa ka NPP Mowkaiaw Block Committee, ha ryngkat ka jingwan ïadonlang naduh ki MDC kynthup ïa u ma Thombor Shiwat CEM ka JHADC, MLA ka Shnangpung ma Comming Ymbon, u ma Wailadmiki Shylla MLA Jowai, u ma Nehlang Lyngdoh kyrtong MLA na Khliehriat Constituency, ka kong Santa Mary Shylla kyrtong MLA na Sutnga Constituency, u bah Banjop Pyngrope MDC KHADC nalor kiwei de kiba la shah khot angewbha.
Ka jingïalang mynta ka sngi kala long kaba i shongkun bha da ka jingwan tuid jong ki paidbah nongshong shnong naduh ki Waheh Shnong na katei ka thaiñ kiba la doh haduh 28 ngut, ki longkmie, ki longkpa ki khun samla kiba la pyndap ïa ka madan ba pynlong ïa ka jingïalang ha Khmutwasaiñ Mowkaiaw, West Jaiñtia Hills bala pynïaid da u ma Gilbert Sten.
Haba ai jingkren ha kane ka sngi na ka liang u ma Wailadmiki Shylla, District President NPP ula pynsngew ba ka party NPP mynta kaba la kynjoh sha ka 10 snem bad kila don mynta 21 ngut ki MLA, i wei ha ka Lok Shaba bad uwei ha ka Rajha Sabha, katba ha kiwei ki jylla kum ha Manipur ki don 7 ngut, 1 na Arunachal Predesh bad mynta ka party ka dang trei shitom ban wan ha ka bor ha kane ka Election 2023.
U ma Thombor Shiwat CEM ula ong ba ka sorkar mynta hapoh ka jingïalam ka NPP kala shimkhia ha kaba ïadei bad ka kam pud kam sam bad mynta ha ka jingïasoi ïa ka MoU la dep ban pynbeit ïa ki jaka puta ha ka Phase-I bad kaba sah sha kane ka Phase-II kaba kynthup lang ïa ka Block-I bad Block-II, shuh shuh ula kyntu khamtam ïa ki nongshong shnong kiba hap hapoh ka Elaka Labang Nongphyllut bad kin ïatreilang bad ka District Council ban pynphai biang ïa kitei ki shnong shapoh ka jylla.
Ula kyntu ïa ki paidbah ha khappud ba kin wan ban thep kyrteng ïa ki jaka puta hapoh ka Council khnang ba ki jaka jong ki kin hap shapoh u pud u sam jong ka jylla.
Na ka liang u Myntri Rangbah ka jylla u Conrad K Sangma haba kren ha kane ka sngi ula pynpaw ka jingkmen ban ïohi ïa ki paidbah kiba la wan sha kane ka jingïalang bad u don ka jingkyrmen ba ki paidbah jong ka 4-Mowkaiaw kin ai ka jingjop ïa ka Party NPP ha u 2023 lyngba u Kyrtong jong ka u ma Habahun Dkhar.
U pynpaw ruh ba u don ka jingkyrmen kaba khraw ba ka Party NPP kan sa long ka Party ba marwei ban synshar ïa ka jylla ha kane ka samoi ban wan.
Ula pynshai ruh halor ka jingkynnoh jong kiba bun ba lang kiba ong ba dei ka NPP ba khang ïa ka jingkhaï ïa u Mawshun hadien bala pynmih hukum da ka ïingbishar, hynrei ula ong ba kane ka long ka jingkren lamler, pynban dei ma u ba la shim khia ban ïa kynduh bun bun sien ïa ki bor ba halor jong ka sorkar India ban ïatai ïa kane ban ïoh pyllait ïa ka jingkhaïi Mawshun sha Bangladesh
Ula pynkynmaw ruh ba ka Sorkar Meghalaya hapoh ka jingïalam jong ka NPP mynta ka la long kawei na ki jylla kaba wan shakhmat ha kaba pyntreikam ïa ka PMGSY.
U Sangma ula ong ba na ka daw jong ka jingjur palat ki kam pyntriem ha ki thaiñ Barato ka sorkar hapoh ka jingïalam jong u kala dep ban pynkhreh nadong shadong ban buh noh ïa ka Police Out Post ha Barato. Ïa kane yn ula khmih lynti ba hapoh ki kyndiat bnai yn lah ban buh noh ïa u Mawnongrim ban sdang noh ïa ka jingpyntrei.
Ha ka juh ka por u Sangma ula ong ruh ba yn sa buh noh ïa ka Fire Service ha shnong Raliang, ïa kaba ula khmih lynti ban ïoh buh Mawnongrim ha ka juh ka sngi ba wan buh ïa ka Borato Police Out Post. U Sangma ula kren ruh halor shibun ki kam pynroi bad ruh ha kaba ïadei bad ki lynti ki syngkien.
La ïoh ruh ka jingkren na u ma Habahun Dkhar, kyrtong jong ka Party na kane ka 4-Mowkaiaw. Haba kren u ma Habahun ula ong ba kane ka Constituency ka dei kaba duk tam haba ïa nujor bad kiwei pat ki Constituency hapoh ka jylla. U ong ba ki briew ha kane ka Constituency ki long kiba im tang da ka rep ka riang bad jingbylla sngi bad ka ri jingri, kumta lada u poi sha ka thong un sa wanrah ïa ka rukom rep katkum ka juk ba mynta khnang ba ki nongrep kin myntoi bad ba yn lah ban pynmih khambun ka bam ka dih hapoh kane ka Constituency.
Ula pynpaw ruh halor ka jingsahdieh halor ki surok bad ki lynti ki syngkieng. Kumta u kyntu ia ki nongkyrshan ba kin ai ka kti ka mon ka kti ka diang kumba kila kyrshan bad pynjop ïa u kum u MDC kumta ruh kin pynjop ïa u kum u MLA jong kane ka Constituency, khnang ba un lah ban wan rah shibun ki lad jingpynroi hapoh kane ka Constituency 4-Mowkaiaw.