Khliehriat, Risaw, 18: Hadien ka jingbud dien ïa ki shem ai jingnang jingstad, ka Jaiñtia National Council bad ka Khasi Students Union East Jaiñtia Hills District Unit, ki la lap ba hapoh Rymbai Government Secondary, yn shym la don nonghikai u ban hikai ïa ka subject Science, mynta la don shi snem bad kane ka ktah haduh katta katta ïa ki khynnah skul namar ka subject Science ruh ka dei kawei na ki subject ba donkam.
Kitei ki ar seng ki la pynher ki jingthoh sha ki bor kiba halor bad shaduh u Director of School and Education Litteracy jong ka Meghalaya bad dawa ruh ba dei ban thung nonghikai noh mardor ha katei ka skul bad ruh ki nongïalam jong ka JNC bad ka KSU East Jaiñtia Hills District Unit ki la ïakynduh ruh ïa ka SDSEO East Jaiñtia Hills District, ka kong P.Dkhar bad ïakren halor katei ka mat bad na ka liang ka SDSEO ruh ka la shim khia ïa kane bad mynta ka sngi ka 18 tarik ka tnat pule puthi na East Jaiñtia Hills District ka la pyllait ïa ka jingpynbna lait kam ne advertisement halor katei ka post nonghikai science ha Rymbai Govt. Secondary School.
Na ka liang ka Jaiñtia National Council bad ka Khasi Students Union East Jaiñtia Hills ki la pynpaw ka jingsngew nguh bad ai khublei ïa u Deputy Commissioner ka East Jaiñtia Hills District, u Abhilash Baranwal, IAS bad ka SDESEO ka kong P.Dkhar kiba la lah ban pynmih ïa ka advertisenemt bad la buh ruh ba ïa ka interview yn pynlong da ka Walk In Interview ha ka 28 tarik mynta u bnai risaw 2023 na ka bynta ki ar tylli ki post ha ka subject Arts bad kawei ka post na ka bynta ka subject Science ha katei ka skul ha Rymbai.
Na ka liang u Publicity Secretary KSU East Jaiñtia Hills District, u samla Hamewanpynhun Ryngkhlem kumjuh ruh u Education Secretary, u samla Emmon Chyrmang ki la kyntu ïa ka tnat pule puthi jong ka district ba kin pynlong ïa kane ka interview da ka lynti kaba khuid ba suba ka bym don kano kano ka jingleh shiliang khmat ïano ïano ruh, ka seng lyngba ka Education Cell ka kyntu ruh ïa kito kiba aplai ïa kitei ki post ha Rymbai Government Secondary School ba kin aplai kham kloi bad ruh ba kin jied ban ïaid da ka lynti kaba beit ba hok bad kaba khuid.
Kumjuh ruh u Vice President jong ka Jaiñtia National Council, u bah Ency Shadap bad u Education Secretary, u bah Diamond Bareh ki la ai khublei ïa ka SDSEO kaba la shim khia ïa kane ka mat ba donkam kaba dei na ka bynta ban kyntiew ïa ka pule puthi jong ki khynnah ha katei ka skul bad na ka liang ka seng ka kyntu ïa ki bor district kumjuh ruh ia ka tnat pule puthi ba ki dei ban da peit bha ba ki skul ki dei ban biang ki nonghikai khamtam ha kiba hikai ha ki subject kiba donkam khnang ba ki khynnah skul kin nym duh ïa ki jinghikai.
