Mawkyrwat, Risaw, 18: U bah Renikton Lyngdoh Tongkhar uba dei u nongmihkhmat jong ka Mawkyrwat Constituency kum u kongsan mynta ka sngi u la ïoh ban plie paidbah ïa kawei na ki jaka treikam jong ka Tehsonglang Village Organisation kaba dei kawei na ki shatri ba kdup ïa ki 18 tylli ki Self Help Groups (SHGs) kaba don ha shnong Photjaud, South West Khasi Hills District.
Shwa ban sdang ka jingïalang ka kong Merciful Kharlyngdoh ka la ïoh ban pule ïa ka jingïaid lynti jong ka Tehsonglang Village Organisation Photjaud kaba la sdang naduh u snem 2017 ha kaba ki don haduh 18 tylli ki Self Help Groups (SHGs) hapoh ka jingpeit jong ka haduh mynta ba ki la ïoh ïa ka jaka treikam ba pura na ka bynta ban pyntyllun ïa ki kam jong ki SHGs hapoh jong ka shnong.
Haba kren ha ka jingïalang, u bah Renikton Lyngdoh Tongkhar pynpaw ka jingaikhublei kaba kyrpang na ka bynta ka Tehsonglang Village Organisation Photjaud kaba la shim ïa kane ka synjam ban don la ka jong ka jaka treikam ba pura ne kum ka ophis. Shuh shuh ula ong ba ka jingdon jong ka Village Organisation (VO) kan long kawei na ki lad ïarap ïa shibun ki longïing longsem ban kyntiew ha ka liang ka ïoh ka kot bad shibun ki jingmyntoi kiba na ka liang ka sorkar ka ai jingïarap lyngba ki VO bad ki SHGs bapher bapher.
Namarkata, u bah Renikton la kyntu ïa ki paidbah ba kim dei ban sheptieng ïa u Aadhar Card namar ha kine ki sngi ba baroh ki jait skhim ba ka sorkar ka ai ki ïaid lyngba u Aadhar bad lada kim don ïa u Aadhar kan long ka jingduhnong kaba khraw ha kaba ïa dei bad ki skhim ba ka sorkar ka la dep ban mang. U la ong shuh shuh ba ki briew ha kane ka shnong ki la pynpaw ïa ki khmat baphuh samrkhie ha kane ka sngi ba ki la ïoh ïa kane ka jaka treikam na ka bynta ka Tehsonglang VO, kumta u kyrmen skhem lyngba kane kin lah ban pyntyllun khambha ïa ki kam ki jong ki ha ki liang baroh.
“Ki longkmie ki dei ban long kiba skhem ka jingmut jingpyrkhat namar lada ka longïing ka tei ïa ka ïing halor u mawsiang ka long ka jingkyrmen ïa ka lawei ki khun pateng la pateng”, ong u bah Renik bad kumjuh ruh ka ïing ka sem ka suk ka kmen bad kan nang roi ha ki kam baroh lada u kpa jong ka iing u don ka jingïatreilang bad ka kmie ha ka kyrshew kyndiah ban kyrshan ïa ka ïing ka sem.
Kiba la ïadonlang ha kane ka sngi ki long u bah M. War, General Manager jong ka DCIC, South West Khasi Hills District, kong Nasaka Dkhar, Junior Manager jong ka Rural Development Officer, u bah Eson Khongrymmai, District Mission Manager DNM, NRLM, Mawkyrwat C&RC Block, u bah T. Shangdiar, Myntri Shnong jong ka Photjaud War bad na ka Seisohlang SHGs lem bad kiwei de.
