Paw ka sap ki khynnah skul ka South West Khasi Hills ha ka 31st National Children’s Science Congress 2023

Mawkyrwat, Risaw, 18: Ryngkat ka Ri India baroh kawei, ka State Council jong ka Science Technology & Environment (SCSTE), Meghalaya ryngkat ka District Planning Officer, South West Khasi Hills District mynta ka sngi ka la pynlong ïa ka 31st National Children’s Science Congress 2023 kaba dei jong ka District Level Children’s Science Congress hapoh ka Hall jong ka ophis u Public Health Engineering (PHE), Mawkyrwat Division.
Ïa kane ka program la pynlong halor ka phang pdeng, “Understanding Eco-system for Health & Well-being” bad ïa kane ka program la bei tyngka National Council for Science & Technology Communication, Department of Science & Technology jong ka Sorkar India bad Planning Department jong ka Sorkar Meghalaya.
Ka jingthmu jong kane ka prokram ka long ban pynshlur ïa ki khynnah skul bad kumjuh ruh ban pynpyrkhat kyrpang ha kaba ïa dei bad ka saïan bad ka innovation lyngba ka jingpynïeng ïa ki ha ki rynsan jingïakop ym ban batai ïa ki kot pule hynrei kaei ba ki khynnah skul ki shem bad ki lap lyngba ka jingleh jong ki ïa ki project ne ki activities ha ki bynta bapher bapher.
Kiba ïadonlang ha kane ka sngi ki long u Dr. D.R. Wahlang, Programme Officer, State Council jong ka Science Technology & Environment (SCSTE), ka kong S. Kharsahnoh, District School Education Officer (DSEO), South West Khasi Hills, u Resly Roy Pariong, Assistant Science Teacher jong ka Pariong Presbytery Higher Secondary School bad u bah Rajesh Wanshnong, Assistant Science Teacher jong ka St. Peter’s Higher Secondary School, Nongstoiñ kum ki Evaluators ryngkat ka jingïadonlang ki nonghikai bad ki khynnah skul.
Ki skul kiba wan ïashimbynta ha kane ka program ki don baroh 4 tylli ki skul bad la phiah ha ki ar bynta kata Junior bad Senior Category. Ka Presbyterian Higher Secondary School, Mawlangwir, ka Mawten Secondary School bad ka Little Star Higher Secondary School, Mawkyrwat ha ka Junior Category katba ka ka Maharam Government Higher Secondary School, Mawkyrwat bad ka Presbyterian Higher Secondary School, Mawlangwir ha ka Senior Category.
Hadien ka jingpyni bad ki jingbatai na ki khynnah skul, la don ruh ka jingsam ïa ki syrnod kata na ka bynta ki Senior ba 15 snem shajrong la ïoh ban jied ïa u Nelson Cooper Marbaniang na ka Little Star Higher Secondary School, Mawkyrwat u la jop halor ba u la wanrah shaphang ka “Traditional use and Medical Value of Sohphie in Mawkyrwat”. Nangta, u Dame Bantei Marbaniang na ka Presbyterian Higher Secondary Mawlangwir ula jop ba u la wanrah shaphang, “The Verities of Fishes in the pond and stream at Mawlangwir and Local production of Fish”.
Na ka bynta ki Junior kiba hapoh 15 snem u Mebanpyntngen Lyngdoh na ka Mawten Secondary School ba u la wanrah na ka bynta, “The used of Wild edible plants at Mawten” bad ka Saphibanbet Thongni na ka Presbyterian Higher Secondary School, Mawlangwir bala wanrah shaphang ka “Identification of terrible and inedible Mushroom”.
Lah ban kdew ba kine ki khynnah skul kiba jop mynta ka sngi kin sa ïoh ban leit mihkhmat bad ïa shimbynta ne ban mihkhmat na ka distrik sha ka State Level ha Shillong.
Ïa kane ka program la pynïaid da u bah Tennyson Rynghang, Research Assistant jong ka District Planning Office, South West Khasi Hills District.