Ha u DC phah tuklar ka HYC ban ker kynroh ïa ki transformer ha ka thaiñ Mawthawpdah

Mawkyrwat, ‘Naitung 25: Ka Hynñiewtrep Youths Council (HYC) jong ka Mawthawpdah Area Unit ki la leit buh da ka jingthoh ha u Deputy Commissioner jong ka South West Khasi Hills District hadien ba ka seng ka la ïoh ka jingujor na ki paidbah namar ka jingbym ker kynroh jong ka MePDCL Mawkyrwat Division ïa ki tranfarmer kaba la buh jingma ïa ki nongshong shnong khamtam ïa ki khynnah rit bad kumjuh ïa ki jingri jingdup.
Ïa ka jingleit ban ïa kynduh la lamkhmat da u bah Boneyfast Shangpliang kum u President, bad u bah Wellman Lyngiong kum u Secretary jong ka Hynñiewtrep Youths Council (HYC) jomg ka Mawthawpdah Area Unit.
U bah Wellman Lyngiong, Secretary Hynñiewtrep Youths Council (HYC) jomg ka Mawthawpdah Area Unit haba kren ha ki ladpathai khubor u la ong ba ha ki snem ba la dep uwei u khynnah u la duh ei ïa la ka mynsiem tang namar ka jingtorti jong kane ka ophis kaba la shu buh kumto ha madan khlem da ker kynroh ne jingïada ïa u transformer. Shuh shuh u la ïathuh ym tang katei ka mynsiem briew hynrei jan man ka por ki jingri jingdup ki ïap ha kine ki jaka buh transformer.
Ym tang mynta ka sien ki la pynsngew hynrei la bun sien ki la pyrshang ban ïa kren sngewthuh bad u SDO jong katei ka MePDCL ba kin ker da ka jingker khnang ban lait kano kano ka jingsngewsih, hynrei kaba sngsih ka long ba u SDO jong katei ka ophis bad ka ophis kim ju patiaw ïa kita ki jingkyrpad jong ki paidbah, hynrei ki phah kylla ha ki bor shnong bad ki paidbah shnong ba kin ker ïa u transformer.
Namarkata, ka seng kam banse ban shim syndon ïa ka rai ba kan buh da ka jingthoh ha khmat jong u Deputy Commissioner ba un tuklar lem ïa katei ka tnad treikam ba kan shimkhia ban ker da ka jingker kiba biang khnang ban lait kano kano ki jingjia ba sngewsih na ki transformer ïa kaba na ka liang ka ophis bording ka la shu buh ha madan khlem jingïada ei ei.