Shillong, Risaw 31: Ha ka jingpynbna ba la pynmih ha ka sngi Palei, ka sorkar jylla ka la pynbna ïa ka khlaw raid jong ka Dorbar Shnong Mawpen, Mawsynram C & RD Block, East Khasi Hills kum ka khlaw kaba la dei ban pynneh pynsah ban tyngkai ne kum ka Community Reserve ka ban tip kum ka Dorbar Shnong Mawpen Community Reserve bad kane ka hukum kan treikam noh mardor.
Ki dkhot jong ka Managing Committee jong ka Dorbar Shnong Mawpen Community Reserve kin kynthup ïa u Bah Kyrshan Risaw kum u Chairperson bad u Bah Pynshait Wanrieh, u Bah Dapmon Risaw, u BahAibor Suna, ka kong Rakhel Lyngkhoi, ka kong Deiphi Myrthong, u Bah Bunglang Risaw, u Bah Rosehenry Bynnud kum ki dkhot. Na ka liang Divisional Forest Officer, Khasi Hills Wildlife Division, Shillong lane kiba la jied kiba ym dei kiba hapoh ka rank Forester-I kin dei kum Member Secretary. U Chairperson jong ka Community Reserve un long ruh u Honorary Wildlife Warden jong ka Community Reserve.
Ha kawei pat ka hukum ba la pynmih ka sorkar ka la pynbna ba ka khlaw raid ne ka community forest jong ka Seiñ Raij Khloo Kynrien, West Jaiñtia Hills kum ka khlaw kaba dei ban tyngkai ne pynneh pynsah (Community Reserve) ka ban tip ruh kum ka Ka Lum Thangbru Khloo Kynrien Community Reserve ha kaba kane kan treikam noh mardor.
Ki dkhot jong ka Managing Committee jong ka Ka Lum Thangbru Khloo Kynrien Community Reserve kin kynthup ïa u Bah Wanmi Dhar kum u Chairperson bad u Bah Hiarmon S Manar, u Bah Nibha Lapasam, Davidson Sayoo bad u Kolan Shadap kum ki dkhot. Ka Divisional Forest Officer, Jaiñtia Hills Wildlife Division, Jowai ne kiba la jied da maka kiba ym dei ban long hapoh ka kyrdan Forester-I yn dei ban long Member Secretary. U Chairperson jong ka Community Reserve yn long Honorary Wildlife Warden jong ka Community Reserve.
