SHILLONG, Risaw 14: Ka Shillong Lajong Football Club ka dap da ka jingsngewkmen ban pynbna ïa ka jingïatreilang bad ka Royal Challenge [Packaged Drinking Water], kawei na ki kompeni Um-dih ba pawnam jong ka ri India, kum ka nongïarap bei tyngka lane Co-sponsor ïa ka kynhun na bynta ka samoi ban wan jong ka lympung I-League.
Kane ka jingïatreilang ka long kaba kongsan na ka bynta ka Shillong Lajong FC, kaba pynskhem ïa ka jingkular jong ka ban kyntiew ha baroh ki liang jong ka phutbol, la ka long ïa ka kynhun shimet ne ka jinglah jong ka ban wanrah jingkylla ha ka phutbol India baroh kawei.
Ka Royal Challenge, kaba la bna nam ïa ka jingaiti jong ka ban kyntiew ïa ki jingialehkai bad ruh ka jingïatreilang bad ka Royal Challengers Bangalore ha ka Indian Premier League, ka wanrah ryngkat ïa ka mynsiem #Jied kaba Shlur (#ChooseBold) jong ka na bynta ki jingïakhun jong ka Shillong Lajong ha madan ïalehkai.
Ryngkatlang, ki thmu ban kyntiew ïa ka rukom ïalehkai jong ka kynhun #NayaShers, katba ka dang pyrshang ban pynïajan ïa ka jingiadei kaba kham jylliew bad ki nongkyrshan kumjuh ruh ïa ka imlang ka sahlang ha ka thaiñ.
“Ngi sngewkmen ban pdiang sngewbha ïa ka Royal Challenge [Packaged Drinking Water] bad ka longïing jong ka Shillong LajongFC,”la ong u Managing Director jong ka Shillong Lajong FC – u Larsing LD Sawyan.
“Ka jingaiti ban wanrah jingbha bad ka jingpynthymmai ka ïahap bha bad ki jinglong jingman jong ka klob. Khlem jingartatien, kane ka jingïatreilang kan pynbha ïa ka jingpyrshang jong ngi ban wanrah jingkylla ha ka I-League bad ban wanrah jingkmen na bynta ki nongkyrshan kiba ieid jong ka klob.”
Na ka liang jong ka kynhun ‘Royal Challenge Packaged Drinking Water’ ka la pynpaw ïa ka jingsngewkmen, da kaba ong, “Ngi sngew sarong ban ïatreilang bad ka Shillong Lajong FC, ka klob kaba pyni shisha ïa ka mynsiem bad ka jingieit jong ka ïa ka phutbol ha India. Ryngkatlang, Ngi thmu ban pynsah jingkynmaw na ka bynta ki nongkyrshan phutbol, ban pdiang ïa ka jingmut ‘#ChooseBold’ (Jied kaba shlur), bad ban tei ïa ka pateng ha kane ka jingïalehkai.”
Kane ka jingïatreilang ka buh ïa ka Shillong Lajong FC bad ka Royal Challenge ha ka kyrdan ba thymmai ha ki lympung phutbol ha India, ban kyntiew ïa ka rukom ïalehkai bad ban pynjan ïa ki nongkyrshan sha kane ka jait jingïalehkai kaba itynnad.
