Nongpoh, Jymmang 09: Ka long shisha ka jingkyrkhu na ka bynta ki nongrep hapoh ka them Ri Bhoi, ha kaba mynta ka sngi u Myntri Rangbah ka Jylla, u Conrad K Sangma, u la pynbna paidbah lyngba ka CM-Assure Scheme ka sorkar jylla ka la dep ban mang haduh T. 4 klur na ka bynta ka Ri Bhoi District, kaba dei ka thong ban kyntiew ïa ka ïoh ka kot ki nongrep ha kane ka District.
Ïa kane la kren da u Myntri Rangbah ka jylla, u Conrad K. Sangma haba shim bynta kum u kongsan ban pynlait paidbah ïa haduh 1700 MT u synsar ban pynïaid iew da ka sorkar, ha ka jingïalang kaba la long mynta ka sngi ha Basuba Brooms Producer Company Limited kaba don ha ka shnong Khliehumstem ba hap ha Mawhati Constituency ha Ri Bhoi District.
U Mynti rangbah ka jylla, u Conrad K. Sangma u la ïathuh ba ka sorkar jylla lyngba ka CM-Assure Scheme ka la dep ban mang pisa haduh T. 100 klur ban kyntiew ïa ki nongrep ha ka jylla bad na katei ka T.100 klur ba dang mang tang ha kine ki khyndiat bnai, la dep ban pynlait haduh T. 10 klur bad na ka T.10 klur la mang haduh T. 4 klur tyngka tang na ka bynta ki nongrep ka Ri Bhoi District.
Une u synsar ba la kot 1700 MT ba la pynlait da u Myntri rangbah kin phah sha Central Warehousing Corporation, Guwahati na ka bynta ban lilam pat hadien sha kino kino ki Company ne ki riew shimet kiba lah ban khlieh dor khnang ban myntoi ki nongrep bad ka ïoh ka kot ka jylla.
Haba kren ha kane ka sngi, u Mynti rangbah ka jylla, u Conrad K. Sangma u la kren shai ba ka sorkar ka don ïa kata ka thong ban kyntiew ïa ki nongrep hapoh ka jylla bad dei namar kane ka daw lyngba kane ka CM-Assure la mang pisa haduh T. 100 klur kaba long kawei na ka thong ba ka sorkar ka thrang ban kyntiew ïa ka ïoh ka kot ki nongrep lyngba ki kam rep kam riang bad khamtam sha ki shnong nongkyndong.
U la ong ruh ba ka sorkar jylla kan don ryngkat bad ki nongrep bad kan dang ïai trei ryngkat bad ki nongrep, ha kaba lyngba ki kam rep kan kyntiew ïa ka ïoh kot ki nongrep bad ruh ba ka sorkar jylla kan ïoh ïa ka khajna da kaba kin pynïaid iew ïa ki mar rep shabar ka jylla.
U la kren ruh halor shibun ki thong jogn ka sorkar kiba kynthup naduh ka CM-Assure kaba dei ka thong ka sorkar ban kyntiew kyrpang ïa ka ïoh ka kot ki nongrep lyngba ka kam rep kam riang, ka CM-Elevate ban dang kyntiew ïa ki kam rep sha ki shnong nongkyndong bad ruh ban pynmih ïa kita ki mar rep kiba khlem pyndonkam dawai bad kiwei kiwei ki lad ki lynti kiba ka sorkar ka thrang ban kyntiew ïa ka ïoh ka kot ki nongrep lyngba ki kam rep ki kam riang hapoh ka jylla.
La sakhi ruh ha kane ka sngi, ba u Myntri rangbah ka jylla, u Conrad K. Sangma u la aiti ruh ïa ka Kali Pick-up sha ki nongrep kiba dei kita ki nongrep kiba ïoh jingmyntoi na ka CM-Elevate. Ha kane ka sngi, kiwei kiba la don bynta lang ki kynthup ïa u u MLA ka Mawhati u Bah Charles Marngar, U deputy Commissioner ka Ri Bhoi, u Abhilash Baranwal, ki ophisar sorkar na ka tnad Agriculture, lem bad ki paid nongrep na kylleng ka thaiñ Ri Bhoi.
