Jowai, Jymmang 09: Ka Mupliang SC kala khur ïa ka jingjop da 9 wiket pyrshah ïa ka NEAU CC (ATS) ha kawei naki jingïalehkai jong ka lympung ‘District Cricket League 2025’ bala pynïaid daka West Jaiñtia Hills District Cricket Association (WJHDCA) hynne ka sngi Thohdieng (09 tarik u Jymmang, 2025) ha Mini Stadium, Khliehtyrshi.
Haba phai sha kane ka jingïalehkai, ïa ka jingkynting pisa (toss) la jop da ka Mupliang SC kaba la kam trai ban kawang bol nyngkong. Haba shimti ïa ka pali pali tied ba nyngkong, ka NEAU CC (ATS) ka la ïakynduh ïa ka jingeh namar ka la lah ban kamai tang 63 ron bad liem lut baroh 10 wiket haka ober kaba 14.3.
U Arman B Marak, 17 ron (khlem out) bad u Alban Presley R Sangma, 16 ron kila long tang ma ki ar ngut napdeng ki nongtied jong ka NEAU CC (ATS) kiba lah ban kynjoh sha ka phew ron. U Defender Dhar (C), nongkawang ball jong ka Mupliang SC ula ïoh ban khur marwei haduh 5 wiket na ki 4 ober.
Katba ka Mupliang SC ha ka pali jong ka ban beh ïa ka thong, ka la lah ban pynjop suk da ka ba ïoh 65 ron na ki 11.1 ober bad duh tang 1 wiket. U Mewan Phawa ula kamai 21 ron (khlem out) na ki 34 bol ryngkat 2 tylli ki Fours (4s), u Oniwanker Sna pat ula noh synñiang 16 ron (khlem out) na ki 14 balls ryngkat 3 tylli ki Fours (4s) bad u Byforcestar Dhar ula kamai 16 runs na ki 19 bol ryngkat 2 tylli ki Fours (4s).
Dei tang u Achigrim W Sangma, uba la ïoh ban khur wiket na ka NEAU CC (ATS). U Defender Dhar jong ka Mupliang SC uba ïalehkai bha ha ka bowling u la ïoh ban khur ïa ka Nam Man of the Match.
Da kane ka jingjop, ka Mupliang SC kala long ba ar haka Points Table jong ka Pool A da kaba jop saw sien na baroh 5 tylli ki jingïakhun bad kamai 8 Points, ka NEAU CC (ATS) pat ka jop tang shisien bad rem saw sien na ki 5 tylli ki jingïakhun bad ka long ba san ha ka Points Table jong ka Pool A.
Ka jingïalehkai ha kane ka sngi Saitjaiñ (10/05/2025) kan long hapdeng ka Phramer CC pyrshah ïaka Khliehtyrshi SC naduh ka por 8 baje shiteng mynstep.
