Lyngba u Ricky Kharkongor rung semi final ka Meghalaya ha ka U-20 Men’s National Football C’ship

Shillong, Jymmang 09: Ka Meghalaya ka la buh jaka ïalade ha ka semifinal jong ka Swami Vivekananda U20 Men’s National Football Championship 2025 hadien ba ka la pynliem noh ïa ka Karnataka da 1-0 kol ha ka jingïakhun kaba la long ha madan Ramakrishna Mission Ashrama ha ka sngi Thohdieng (09 tarik Jymmang, 2025).
Ka kol kaba la thep da u Ricky Kharkongor (4’) ha ka minit kaba saw jong ka kylla step ka la long ka namtam ban ïalam ïa ka Meghalaya sha ka jingjop. Ka Karnataka ka la pyrshang tyngeh ban wanphai biang bad thaw katto katne ki kabu, khamtam ha ka kylla miet. Hynrei ki rangapdien jong ka Meghalaya ki la ïeng skhem, da kaba khanglad sdam ïa ki nongïalehkai ka liang pyrshah ban thaw kino kino ki kabu ba paka.
Ka Meghalaya kaba la jam sha ka Quarter Final ha ka rukom kaba shongkun bha, kaba la jop ïa baroh lai tylli ki jingïakhun ha ka Group A, ka la shem ba ka jingïalehkai ka long kaba jwat bha pyrshah ïa ka Karnataka hadien ba ka ïoh ban thep ïa ka kol lamkhmat. Ka bol pashat na ka liang kadiang kaba la pynrung hapoh phyllaw kol jong ka Karnataka la ïoh ban thep da kaba suk najan da u Ricky Kharkongor watla ki don arngut ki rangapdien ba pahara sawdong ïa u.
Naduh kane ka khyllipmat, ka Karnataka ka la ïaleh shitom ban thaw ïa ki lad ha baroh kawei ka jingïakhun bad ki la don ruh ki khep ba ka la jan ïoh ban pynphai. Hynrei kumno re kumno, ka jingthrang ban pynïakhaid ka la sahkut khlem da urlong haduh kaba kut jong ka por.
Kumta da kane ka jingjop, ka kynhun ïalehkai jong ka Jylla Meghalaya kan pynkhreh ban ïakhun pyrshah ïa kano kano ka kynhun ba jop ha ka Quarter Final hapdeng ka lahduh (Champion) jong ka Group C bad Group D, ha ka Semi Final. Ki jingïalehkai ha ka Group C bad D kin sdang marïabud ha ka 11 bad 12 tarik Jymmang.
Shuwa kane, ka Karnataka ka la pyndep kum ka kynhun lahduh jong ka Group B da kaba kamai 12 poiñ na ki saw tylli ki jingïalehkai, bud sa ka Gujarat kaba la khur 9 poiñ, nangta ka Tamil Nadu kaba la khur 6 poiñ, ka Chhattisgarh kaba la khur 3 poiñ, bad ka Andaman & Nicobar kam shym la lah ban kamai wat tang shi poiñ.
Ka Karnataka ka la pynkut ïa ka jingïalehkai kaba paka jong ka ha ka Group B da ka jingjop kaba khraw haduh 10-0 kol pyrshah ïa ka Andaman & Nicobar, kaba dei ka jingjop kaba saw ha ki saw tylli ki jingïakhun.
Ha kawei pat ka liang, ka kynhun ïalehkai jong ka Meghalaya ka la pyndep ïa ka jingïakhun na ka Group A da kaba jop kput haduh 7-0 kol ïa ka Bihar ban sah khlem shah rem bad ban ïaineh haka kyrdan ba nyngkong ryngkat 9 poiñ ba ka la kamai.