Mawkyrwat, Jymmang 09: Ka Nongrynñiang Sports & Cultural Club ka la long ka kynhun kaba rah ïa ka nam lahduh ha ka lympung ïalehkai kynjatbol kaba la tip kum ka 1st Football Tournament 2025 ba la pynïaid da ka Ïa-Tylli Lang Sports & Cultural Club ha madan shnong jong ka Nongrynniang, South West Khasi Hills District.
Lah ban kdew ba ka jingrah jong ka Nongrynniang Sports & Cultural Club ïa ka nam lahduh ka dei hadien ba ka la ïoh ban khur da 5 – 4 kol pyrshah ïa ka Nongtynniaw Football Club ha ka Tie Breaker namar ha ka regular time kine baroh ar tylli ki kynhun ki la ïoh ban ïa tep mar kawei ka kol. Namarkata, ban rai ïa ka kynhun ba jop ki nongpynïaid ki la shu pynïaleh noh da ka Tie Breaker.
Hadien ba kut jong ka jingïalehkai, la ïoh ban sam ïa ki khusnam sha baroh ar tylli ki kynhun kata sha ka Nongtynniaw Football Club bad sha ka Nongrynniang Sports & Cultural Club bad kumjuh ruh ïa ki khusnam shimet kata, kum u nongthep bun kol u dei u Wantiplang Syiem jong ka Nongrynniang SC uba la ïoh haduh 9 kol bad ‘rang ïalehkai ba tbit ka leit sha u Pynshngain Marthong jong ka Nongtynniaw Sports Club.
U kongsan ha kane ka sngi pynhap pyrda u dei u bah Wadladkyrpang L. Lanrin uba dei u Secretary jong ka Hima Langrin bad ha ka jingkren jong u u la ai mynsiem kitbok kitrwiang ïa baroh ki ‘rang ïalehkai jong ki kynhun ba ki nangkiew shaphrang ha ki jingïalehkai bad khamtam ban ïatreilang ban kyntiew ïa ka kam ïalehkai ha baroh ki liang ryngkat ki nongkitkam jong ka Ïa-Tylli Lang S&CC lem bad kiwei de.
